Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 357 Hüküm no: 460 Orijinal metin no: [70a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İspilyot v. Lisar’ın meyhane hissesini Panayot v. Kanilo’ya sattığı Mahmiye-i Galata dâhilinde meyhâneci tâifesinden İspilyot v. Lisar nâm zimmî mahfil-i kazâda tâife-i mezbûreden işbu râfi‘ü’l-kitâb Panayot v. Kanilo nâm zimmî muvâcehesinde ikrâr ve takrîr-i kelâm edip mahmiye-i mezbûre dâhilinde Sultan Bayezid mahallesinde vâki‘ bir tarafdan Gülfem Hâtun vakfı ve iki tarafdan Katerina bt. Petro nâm nasrâniye mülkü ve bir tarafdan tarîk-i âm ile mahdûd bir bâb mülk meyhânenin sülüs-i şâyi‘i Trandafilo v. Panayot nâm zimmînin mülkü ve sülüs-i şâyi‘i müşterî-i merkūm Panayot zimmînin mülkü ve sülüs-i şâyi‘i benim mülküm olmağla hâlâ ben zikr olunan meyhânede mülküm olan sülüs-i şâyi‘i yirmi iki bin beş yüz akçeye merkūm Panayot’a tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru merkūm Panayot yedinden bi’t-tamâm ahz ü kabz eyledim ba‘de’l-yevm sâlifü’z-zikr meyhânenin sülüsân-ı şâyi‘i merkūm Panayot’un mülkü olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a. 28 Zilhicceti’ş-şerîfe sene 1073 Şuhûdü’l-hâl: Nasuh Odabaşı b. Abdullah, Ali Beşe b. İbrahim, Mustafa b. Receb.