Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 358 Hüküm no: 463 Orijinal metin no: [70b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Reis b. Ali’nin yaptırdığı demirin kaybolduğu iddiasıyla ilgili davasını ispatlayamadığı Mahmiye-i Galata müzâfâtından kasaba-i Tophâne’de sâkin Mehmed Reis b. Ali nâm kimesne meclis-i şer‘de mahmiye-i merkūmede Demirci tâifesinden Lefter v. İstemad ve Petro v. Yani ve İstemad v. Dimitri ve Yani v. Kostantin ve İstemad v. Nikola ve Kostantin v. Nikola nâm zimmîler muvâcehelerinde üzerlerine da‘vâ ve takrîr-i kelâm edip bundan akdem mahmiye-i mezbûrede vâki‘ küçük Kalafatyeri’nde merbût olan dört bin akçe kıymetli sefînem demirini yaptırmak için mezbûrûna teslîm edip onlar dahi zikr olunan demiri yapıp bana getirip teslîm eylediklerinde ben dahi ba‘de’t-tesellüm sâlifü’z-zikr demiri iskele-i mezbûrede vaz‘ eylediğimden sonra merkūmûn zikr olunan demiri mahall-i mezbûrdan hafiyyeten ahz eylemişlerdir taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı aczile istihlâf etmeğin fi’l-hakīka mezbûrûna müdde‘î-i mezbûrun mahall-i mezbûra vaz‘ eylediği demirini hafiyyeten ahz eylemediklerine yemîn teklîf olundukda onlar dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mezbûr Mehmed Reis bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Eyüb Ağa el-Bevvâb-ı sultânî, Zülfikār b. Abdullah, Ahmed Yazıcı b. Mehmed, Ebûbekir Beşe b. Şaban Çukadâr, Mustafa Çelebi b. Receb.