Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 359 Hüküm no: 464 Orijinal metin no: [70b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kanilo v. Yani’nin sermaye ve kazançdan dolayı iş ortakları Yorgi ve Yanaki’de olan alacaklarını tahsil ettiği Bakkal tâifesinden Kanilo v. Yani nâm zimmî mahfil-i kazâda râfi‘ayi hâze’l-kitâb Yorgi v. Dimitri ve Yanaki v. Lumo nâm zimmîler muvâcehelerinde ikrâr ve takrîr-i kelâm edip târih-i kitâbdan mukaddem mezbûrân Yorgi ve Yanaki’ye malımdan sekiz bin akçe verip bakkallık san‘atında mezbûrân ile şerîkler olup hâlâ rızâmız ile fesh-i akd-i şirket ettiğimizde ba‘de külli hesâb re’s-i malım olan sekiz bin akçeyi mezbûrân yedlerinden bi’t-tamâm ahz ü kabz eyledim min ba‘d asl-ı mâldan ve târih-i kitâba gelince hâsıl olan ribhden mezbûrân Yorgi ve Yanaki yedlerinde bir akçe ve bir habbe hakkım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Receb Beşe b. Mehmed, Abdi Beşe b. Ali, Ahmed Yazıcı b. Mehmed, Ömer Beşe b. Osman, Nasuh b. Abdullah, Mustafa Çelebi b. Receb ve gayruhüm.