Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 361 Hüküm no: 467 Orijinal metin no: [71a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Trabzonlu Mehmed Beşe’nin çocuğunun annesi olan ve birlikte gitmek istemeyen cariyesinin itirazının meşru olmadığı Vilâyet-i Anadolu’da vâki‘ Trabzon nâm kasaba sükkânından işbu râfi‘ü’l-kitâb Mehmed Beşe b. Ahmed nâm kimesne mahfil-i kazâda ümm-i veled câriyesi olan Dadyan bt. Franko nâm nasrâniye muvâcehesinde üzerine da‘vâ ve takrîr-i kelâm edip merkūme Dadyan benim ümm-i veled câriyem olup lâkin kâr u kisb ve emlâkim kasaba-i mezbûrede olmağla hâlâ mezbûreyi zikr olunan kasaba-i mezbûreye getirmek murâd eylediğimde imtinâ‘ eder, suâl olunup bana inkıyâdına tenbîh olunmak matlûbumdur dedikde gıbbe’s-suâl mezbûre Dadyan müdde‘î-i mezbûre Mehmed Beşe’nin ben ümm-i veled câriyesi olup lâkin zikr olunan kasabada mezbûrun âhar zevcesi olmağla ol ecilden gitmem dedikde merkūme Dadyan’ın bu cevâbı meşrû‘a olmamağla merkūmenin inkıyâdına tenbîh birle mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi b. Receb, Muharrem b. Receb, Âbidin b. Mustafa, Hüseyin b. Mirza, Ahmed Yazıcı b. Mehmed, Hüseyin b. Mirza ve gayruhüm.