Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 360 Hüküm no: 466 Orijinal metin no: [71a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kapıdağı nahiyesi hududu dahilinde vâki olan beytülmâlin Şehzâde Sultan Mehmed Han Vakfı’na ait olduğu İşbu hüccet Kapıdağı nâhiyesinde olup Şehzâde mütevellîsi ile gümrük emîni beyninde beytülmâle müte‘allik olan da‘vâ hüccetidir. Bu mahalle kayd olundu. Mahmiye-i İstanbul’da cennet mekân firdevs âşiyân merhûm ve mağfûrun leh Şehzâde Sultan Mehmed Hân -tâbe serâhu- hazretlerinin evkāfına bi’l-fi‘l mütevellî olan fahrü’l-emâcid ve’l-ekârim İbrahim Ağa tarafından mahrûsa-i Galata kazâsına tâbi‘ Kapıdağı nâhiyesinde kasaba-i Bandırma subaşısı olan işbu râfi‘ü’l-kitâb Sinan Odabaşı meclis-i şer‘de takrîr-i kelâm edip hâlâ zâbiti olduğum kasaba-i mezbûrede vâki‘ beytülmâl-i âmme ve hâssa yedimde olan hudûdnâme dâhilinde olmağla sâhil-i bahrde vâki‘ olan beytülmâl ve kasaba-i mezbûre limanında lenger-endâz olan sefînelerde vâki‘ olan beytülmâl kadîm-i eyyâmdan beri [va]kf-ı mezbûr için mahsûl kayd olunup vakıf tarafından kabz olunagelmişiken hâlâ kasaba-i mezbûrede gümrük emîni olan Ömer Çelebi deryânın eyyâm-ı şitâda talazı çıkdığı mahalde vâki‘ olan beytülmâl-i mîrî için zabt olugelmişdir deyû mu‘ârazadan hâlî değildir. Cânib-i vakfa küllî gadrı olduğunu Dîvân-ı hümâyûnda görülmek için i‘lâm eylediğimde kadîm-i eyyâmdan sâhil-i bahrde vâki‘ olan beytülmâl hangi tarafdan zabt olugeldiği mahallinde bî-garaz müslimînden istihbâr olunup ihbârları hüccet olunup Dîvân-ı hümâyûna irsâl olunmak fermânım olunmağla kasaba-i mezbûrede bî-garaz müslimîn meclis-i şer‘a ihzâr olunup ba‘de’l-istintâk takrîrleri alâ vechi’l-ihbâr tahrîr olunup yedime vaz‘ olunmak taleb ederim dedikde kasaba-i mezbûre sükkânından Ali Çelebi [b.] Serdar ve Süleyman Çelebi b. Ahmed ve el-Hâc Hüseyin b. el-Hâc Hasan ve el-Hâc Hasan b. İbrahim ve Ali Reis b. Abdullah ve Yakub b. Abdullah ve Halil Reis b. Şaban ve Abdullah b. Abdullah ve sâir cemâ‘at-i müslimûn hâzırûn bi’l-meclis olup husûs-ı mezkûr minvâl-i mezkûr üzre suâl olundukda her biri cevâblarında fi’l-hakīka elli altmış seneden mütecâvizdir kasaba-i mezbûrede vâki‘ olan beytülmâl ve hudûdnâme dâhilinde ve sâhil-i bahrde vâki‘ olan beytülmâli ve kasaba-i mezbûre limanında lenger-endâz olan sefînelerde vâki‘ olan beytülmâli vakf-ı mezbûr zâbitleri ahz ü kabz edegelmişlerdir deyû alâ vechi’ş-şehâde meclis-i şer‘de haber verdikleri bi’t-taleb ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Eş-Şeyh Mahmud Efendi, Abdullah Efendi b. Ahmed el-İmâm, Receb Halîfe b. Abdi el-Kayyım, İdris b. Yusuf, Mustafa b. İbrahim ve gayruhüm.