Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 362 Hüküm no: 469 Orijinal metin no: [71b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Hüseyin’in Ahmed Beşe b. Veli’ye kefaletden dolayı olan borcunu ödemesi için tenbihte bulunulduğu Mahrûsa-i Galata’da Alaca Mescid mahallesinde sâkin işbu râfi‘ü’l-kitâb Ahmed Beşe b. Veli nâm kimesne mahfil-i kazâda zümre-i topçuyândan Mehmed Beşe b. Hüseyin nâm kimesne mahzarında üzerine da‘vâ ve takrîr-i kelâm edip gāib ani’l-meclis Mehmed nâm kimesne zimmetinde cihet-i deyn-i şer‘îden beş yüz akçe hakkım olup meblağ-ı mezbûru gāib-i mezbûrdan mukaddemâ taleb eylediğimde mezbûr Mehmed Beşe meblağ-ı merkūme emr ve kabûlü hâviye kefâlet-i sahîha-i şer‘iyye ile kefîl olmuşidi el-hâletü hâzihî meblağ-ı mezbûru kefâleti hasebiyle mezbûrdan taleb ederim suâl olunsun dedikde gıbbe’s-suâl mezbûr Mehmed Beşe cevâbında fi’l-vâki‘ müdde‘î-i mezbûr Ahmed Beşe’nin vech-i mübeyyen üzre gāib-i merkūm zimmetinde beş yüz akçe hakkı olup lâkin ben ancak mezbûrun nefsine kefîl oldum deyû ikrâr, meblağ-ı mezbûra kefîl olduğunu inkâr edicek müdde‘î-i mezbûr Ahmed Beşe’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka vech-i muharrer üzre meblağ-ı merkūma kefîl olmadığına mezbûr Mehmed Beşe’ye yemîn teklîf olundukda ol dahi yemînden nükûl etmeğin mûcebiyle meblağ-ı mezbûr beş yüz akçeyi müdde‘î-i mezbûra edâ ve teslîme mezbûr Mehmed Beşe’ye benbîh birle mâ vaka‘a bi’t-taleb ketb olundu. Hurrire fi’l-yevmi’s-selh min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa b. Receb, Muharrem b. Receb, el-Hâc Ramazan b. Mehmed.