Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 362 Hüküm no: 470 Orijinal metin no: [71b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Hüseyin’in Ahmed Beşe b. Veli’ye kefaletden dolayı olan borcunu ödemesi için tenbihte bulunulduğu Mahrûsa-i Galata’da Alaca Mescid mahallesinde sâkin işbu râfi‘ü’l-kitâb Ahmed Beşe b. Veli nâm kimesne mahfil-i kazâda zümre-i topçuyândan Mehmed Beşe b. Hüseyin nâm kimesne mahzarında üzerine da‘vâ ve takrîr-i kelâm edip gāib ani’l-meclis Mehmed nâm kimesne zimmetinde cihet-i deyn-i şer‘îden beş yüz akçe hakkım olup meblağ-ı merkūmu gāib-i mezbûrdan mukaddemâ taleb eylediğimde mezbûr Mehmed Beşe meblağ-ı merkūma emr ve kabûlü hâvî kefâlet-i sahîha-i şer‘iyye ile kefîl olmuşidi el-hâletü hâzihî meblağ-ı merkūmu kefâleti hasebiyle mezbûrdan taleb ederim, suâl olunsun dedikde gıbbe’s-suâl mezbûr Mehmed Beşe cevâbında fi’l-vâki‘ müdde‘î-i mezbûr Ahmed Beşe’nin vech-i mübeyyen üzre gāib-i merkūm zimmetinde beş yüz akçe hakkı olup lâkin ancak mezbûrun nefsine kefîl olmuşidim deyû ikrâr [ve] meblağ-ı mezbûra kefâletini inkâr etmeğin müdde‘î-i mezbûr Ahmed Beşe’den müdde‘âsını mübeyyine beyyine taleb olundukda ityân-ı beyyineden izhâr-ı acz birle istihlâf etmeğin fi’l-hakīka vech-i muharrer üzre meblağ-ı merkūma kefîl olmadığına mezbûr Mehmed Beşe’ye yemîn teklîf olundukda ol dahi yemînden nükûl etmeğin mûcebiyle meblağ-ı mezbûr beş yüz akçeyi müdde‘î-i merkūma edâya mezbûr Mehmed Beşe’ye tenbîh birle mâ vaka‘a bi’t-taleb ketb olundu. Fi’l-yevmi’s-selh min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa b. Receb, Muharrem b. Receb, Mahmud Çelebi b. el-Muhzır, el-Hâc Ramazan b. Mehmed, Ahmed Yazıcı b. Mehmed ve gayruhüm.