Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 364 Hüküm no: 473 Orijinal metin no: [71b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan b. Abdullah’ın Hüseyin Bey b. Abdullah aleyhindeki alacak davasının reddedildiği Mahrûsa-i Galata’ya tâbi‘ kasaba-i Kasımpaşa’da Bedreddin Bey mahallesinde sâkin Rıdvan b. Abdullah nâm kimesne mahfil-i kazâda işbu râfi‘ü’l-vesîka Hüseyin Bey b. Abdullah nâm kimesne mahzarında üzerine da‘vâ ve takrîr-i kelâm edip zevcem olup bundan akdem vefât eden Zamâne bt. Abdullah nâm hâtun hâl-i hayâtında merkūm Hüseyin Bey’in yedine bi tarîki’l-emâne elli kıt‘a riyâlî guruş vaz‘ ve teslîm ol dahi vech-i muharrer üzre ahz ü kabz eyledikden sonra merkūme Zamâne meblağ-ı merkūmeyi kable’l-ahz ve’l-istîfâ vefât edip meblağ-ı mezbûr irsen bana intikāl etmekle taleb ederim suâl olunsun dedikde gıbbe’s-suâl mezbûr Hüseyin Bey cevâbında fi’l-hakīka [72a] müdde‘î-i mezbûrun vech-i mübeyyen üzre vârisi olduğunu ikrâr ve zikr olunan meblağın emânet vaz‘ını inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı aczile istihlâf etmeğin fi’l-hakīka müteveffât-ı mezbûre Zamâne Hâtun’un bi tarîki’l-vedî‘a elli kıt‘a riyâlî guruşu olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle müdde‘î-i mezbûr bî-vech ta‘arruzdan men‘ birle mâ vaka‘a bi’t-taleb ketb olundu. Fî gurreti Muharremi’l-harâm li sene erba‘a ve seb‘în ve elf. Şuhûdü’l-hâl: Mehmed Beşe b. Musa, Ahmed Yazıcı b. Mehmed, Hüseyin b. Mirza, Emrullah b. Mehmed, Muharrem b. Receb, Musa b. Mustafa.