Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 364 Hüküm no: 474 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Yorgi’ye olan borcunu ödemesi hususunda Andoni Reis’e tenbihte bulunulduğu Mahmiye-i Galata’da meyhâneci tâifesinden işbu râfi‘ü’s-sifr İstati v. Yorgi nâm zimmî mahfil-i kazâda Andoni Reis v. Yako nâm zimmî mahzarında üzerine da‘vâ ve takrîr-i kelâm edip mezbûr Andoni zimmetinde cihet-i karz-ı şer‘îden bin iki yüz akçe hakkım vardır taleb ederim, suâl olunsun dedikde gıbbe’s-suâl mezbûr Andoni cevâbında fi’l-vâki‘ müdde‘î-i merkūm İstati’ye cihet-i merkūmeden bin iki yüz altmış akçe zimmetimde lâzımü’l-edâ ve vâcibü’l-kazâ deynim vardır dedikde mûcebiyle meblağ-ı mezbûru müdde‘î-i mezbûra edâya merkūm Andoni’ye tenbîh birle mâ vaka‘a bi’t-taleb ketb olundu. Fi’s-selh min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Receb Beşe b. İbrahim, Âbid b. Mustafa, Hüseyin b. Mirza, Mustafa b. Receb, Ahmed Yazıcı b. Mehmed ve gayruhüm.