Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 368 Hüküm no: 482 Orijinal metin no: [73a-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Durmuş v. Petro’nun evini Büyük Emine Hanım vakfına bey‘ bi’l-istiğlâl yoluyla satması Mahmiye-i Galata dâhilinde Sultan Bayezid mahallesinde sâkin Durmuş v. Petro nâm zimmî mahfil-i kazâda mahmiye-i İstanbul’da Büyük Emine Hanım vakfı’na bi’l-fi‘l mütevellî olan işbu râfi‘ü’l-kitâb Ahmed Çelebi b. Mustafa mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Duka v. ( ) nâm zimmî mülkü ve bir tarafdan merhûm Kasım Paşa vakfı ve bir tarafdan mîrî değirmen ve bir tarafdan tarîk-i âm ile mahdûd mülk menzilimi mütevellî-i mezbûra her biri sekiz dirhem olmak üzre seksen altı buçuk riyâlî guruşa bi tarîki’l-istiğlâl bey‘ ve teslîm, ol dahi mâl-ı vakf-ı mezbûr ile iştirâ ve tesellüm ve kabûl eyledikden sonra semeni olan meblağ-ı mezbûru mütevellî-i merkūmun yedinden bi’t-tamâm ahz ü kabz eylediğimden sonra yine ba‘de’t-tahliyye ve’t-tekābuz mütevellî-i merkūm menzil-i mahdûd-ı mezkûru târih-i kitâbdan bir sene tamâmına değin on üç kıt‘a merkūmü’l-vasf guruş ücret ile bana îcâr etmekle ben dahi ücret-i merkūme ile istîcâr ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Es-Seyyid Ahmed Çelebi b. es-Seyyid Nesimi, Abdullah Çelebi [b.] Resul, Mustafa b. Abdullah, Mehmed Çelebi b. Osman, Osman b. İsa, Mustafa b. Receb, Ahmed Yazıcı b. Mehmed, Sefer Beşe b. Yusuf.