Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 368 Hüküm no: 481 Orijinal metin no: [72b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Malkoç’un, Kostantin, Dimo ve İstefan tarafından darb edildiği Mahmiye-i İstanbul’da Mustafa Paşa mahallesinde sâkin Mustafa b. Malkoç nâm kimesne meclis-i şer‘-i şerîf-i lâzımü’t-tevkīrde mahmiye-i mezbûrede Unkapanı’nda sâkin Kıbtiyân tâifesinden Kostantin v. Todori ve Dimo v. Petro ve İstefan v. Nikola nâm zimmîler muvâcehelerinde üzerlerine da‘vâ [73a] [ve] takrîr-i kelâm edip târih-i kitâb günü mezbûrûn ba‘de’l-asr yumruk ile beni bi gayr-ı vech-i şer‘î darb-ı şedîd ile darb eyledi, suâl olunup mûceb-i şer‘îsi icrâ olunmak murâdımdır dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden Mustafa b. Abdullah ve Abdullah b. Mehmed nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-hakīka târih-i mezbûrda müdde‘î-i mezbûr Mustafa’yı mezbûrûn yumruk ile bizim huzûrumuzda bi gayr-ı vech darb-ı şedîd ile darb eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâlis mine’l- Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa b. Receb, Emrullah b. Mehmed, Ahmed Yazıcı b. Mehmed, Zülfikār b. Mustafa.