Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 400 Hüküm no: 535 Orijinal metin no: [80b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Murad’ın Sâlih Çelebi ve İsmail Çelebi aleyhindeki tereke davasının reddedildiği Mahmiye-i Galata’ya tâbi‘ kasaba-i Tophâne’de Karabaş mahallesinde sâkine Rahime bt. Murad nâm hâtun meclis-i şer‘-i hatîr-i lâzımü’t-tevkīrde kasaba-i mezbûre mahallâtından Müeyyedzâde mahallesinde sâkin iken bundan akdem vefât eden Yusuf b. Abdullah’ın sulbî kebîr oğulları ve muhallefâtına vâzı‘ü’l-yed olan işbu râfi‘ü’l-kitâb Sâlih Çelebi ve İsmail Çelebi nâm kimesneler mahzarlarında üzerlerine da‘vâ ve takrîr-i kelâm edip müteveffâ-yı mezbûr Yusuf zevcim olup ba‘de vefâtihî muhallefâtının sümünü irsen bana intikāl ve isâbet etmekle hâlâ müteveffâ-yı mezbûrun muhallefâtından olup mezbûrânın vaz‘-ı yed ettikleri eşyâdan hisse-i şer‘iyyemi mezbûrândan taleb ederim, suâl olunsun dedikde gıbbe’s-suâl mezbûrân Sâlih Çelebi ve İsmail Çelebi cevâblarında fi’l-vâki‘ müdde‘iye-i mezbûre Rahime Hâtun müteveffâ-yı mezbûr Yusuf’un mukaddemâ zevcesi olduğunu ve muhallefâtına vâzı‘ü’l-yed olduklarını ikrâr edip lâkin târih-i kitâbdan sekiz ay mukaddem müteveffâ-yı mezbûr hâl-i hayâtında iken müdde‘iye-i mezbûre Rahime’yi talâk-ı bâyin ile tatlîk eyleyip hattâ müteveffâ-yı mezbûr hâl-i hayâtında zevcim Rahime Hâtun’u talâk-ı bâyin ile tatlîk eyledim deyû şuhûd mahzarında ikrâr ve i‘tirâf dahi etmişdir deyicek gıbbe’l-istintâk ve’l-inkâr mezbûrâ[n] Sâlih Çelebi ve İsmail Çelebi’den takrîr-i meşrûhlarına mutâbık beyyine taleb olundukda udûl-i ricâlden Şaban b. el-Hâc Ali ve Mehmed b. Mustafa nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Yusuf hâl-i hayâtında târih-i kitâbdan sekiz ay mukaddem zevcem mezbûre Rahime Hâtun’u bâyinen tatlîk eyledim, el-ân benden mutallakadır deyû bizim huzûrumuzda ikrâr ve i‘tirâf edip bizi işhâd eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebiyle müdde‘iye-i mezbûre Rahime Hâtun bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’l-hâmis aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: İsmail Ağa Kethüdâ-yı voyvoda, Hasan b. Receb, İbrahim b. Himmet, Maden b. Mehmed, Eyüb Ağa b. Abdülahad, el-Hâc Ramazan b. Muhammed, Ömer b. Osman.