Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 400 Hüküm no: 534 Orijinal metin no: [80a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori ve Panayot v. İstati kardeşlerin müşterek evlerini İsteryani v. Yani’ye sattıkları Mahmiye-i Galata müzâfâtından Marmara nâhiyesine tâbi‘ Büyükköy nâm karye sükkânından Todori ve Panayot veledey İstati nâm zimmîler meclis-i şer‘-i şerîf-i lâzımü’t-teşrîfde işbu râfi‘ü’l-kitâb İsteryani v. Yani [80b] muvâcehesinde her biri ikrâr ve i‘tirâf edip ale’l-iştirâki’s-seviy silk-i mülk-i sahîhimde münselik olup karye-i mezbûrede vâki‘ bir tarafdan İsteryani mülkü ve bir tarafdan Kostantin mülkü ve bir tarafdan Yani mülkü ve bir tarafdan tarîk-i âm ile mahdûd fevkānî oda altında bir mahzeni müştemil olan mülk menzilimi fıddî ve râyic fi’l-vakt iki bin yedi yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl ettikden sonra semeni olan meblağ-ı mezbûr iki bin yedi yüz akçeyi her birimiz İsteryani yedinden bi’t-tamâm ahz ü kabz eyledik, ba‘de’l-yevm zikr olunan menzil ve mahzen merkūm İsteryani’nin mülk-i müşterâsıdır, keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Ahmed Yazıcı b. Mehmed, Mustafa Çelebi b. Receb, Ebûbekir Beşe b. Şaban Çukadâr, Mehmed Çelebi b. Mustafa ve gayruhüm.