Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 402 Hüküm no: 537 Orijinal metin no: [80b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Mehmed’in eşi Himmet’i şikayet edip, eşyasını sattığına dair iddiasını ispatlayamadığı Vilâyet-i Anadolu’da vâki‘ Bolaman kazâsına tâbi‘ Belen Karaağaç’ı nâm karye sâkinelerinden olup hâlâ mahmiye-i Galata hâricinde vâki‘ Kalafatçıbaşı mahallesinde sâkine olan Havva bt. Mehmed nâm hâtun mahfil-i kazâda zevci işbu râfi‘ü’l-kitâb Himmet b. Mustafa nâm kimesne mahzarında üzerine da‘vâ ve takrîr-i kelâm edip bundan akdem silk-i mülkümde münselik olan eşyâmdan bir su sığırı dört kara sığır ve bir kırmızı dârâyî kaftan ve bir kırmızı çuka ferâce ve bir kırmızı bogasi entari ve bir bohça ve bir çarşafımı iznim yoğiken mezbûr Himmet ahz ve âhara bey‘ ile istihlâk eylemişdir, hâlâ suâl olunup eşyâ-i merkūmenin kıymet-i şer‘iyyeleri mezbûrdan alıverilmesi matlûbumdur dedikde gıbbe’s- [81a] suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı aczile istihlâf etmeğin fi’l-vâki‘ müdde‘iye-i merkūmenin emlâkinden olan eşyâ-i merkūmesini izni yoğiken ahz ve âhara bey‘ ile istihlâk etmediğine mezbûr Himmet’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm etmeğin mûcebiyle müdde‘iye-i mezbûre Havva bilâ-beyyine bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’t-tâsi‘ aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Çelebi b. Receb, Ahmed Yazıcı b. Mehmed, Hamza b. Abdülganî, Âbid b. Mustafa, Mustafa b. Âbid ve gayruhüm.