Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 402 Hüküm no: 538 Orijinal metin no: [81a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Bayram’ın cariyesi Zamane bt. Abdullah’ı azat ettiği Mahmiye-i Galata’da Câmi‘-i Kebîr mahallesinde sâkin keresteci tâifesinden el-Hâc İbrahim b. Bayram nâm kimesne meclis-i şer‘-i hatîr-i lâzımü’t-tevkīrde mukaddemâ kendiye rıkkını mu‘terife olan işbu uzun boylu kara gözlü kara yağız Macariyyetü’l-asl hâfızatü hâze’l-kitâb Zamâne bt. Abdullah nâm câriye-i memlûkesi muvâcehesinde ikrâr ve i‘tirâf edip ıtk-ı rakabât a‘zam-ı kurbât ve vesîle-i ref‘-i derecât ve sebeb-i duhûl-i cennât-ı âliyât olduğundan mâ‘adâ mu‘takın ıtkı mukābelesinde mu‘tıkın cemî‘ uzvu nârdan âzâd olduğunu nâtık hadîs-i şerîfin mefhûmuna muttali‘ olmağın mevsûfe-i mezbûreyi silk-i mülkümde münselik olduğu hâlde târih-i kitâbdan üç sene mukaddem hasbeten lillâhi te‘âlâ ve haseneten li rûhi resûlihi’l-mu‘allâ tahrîr ve i‘tâk ve zümre-i harâir-i asliyyâta idrâc ve ilhâk eylemişidim mevsûfe-i mezbûre târih-i mezbûrdan beri sâir harâir-i asliyyât gibi hürre olup üzerinde müvellâ için sâbit olan velâ-i şer‘iyyeden gayrı hakkım kalmadı dedikde mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: El-Hâc Süleyman b. Abdullah, Yusuf Beşe b. Abdullah, natır Hasan Beşe b. Abdullah, el-Hâc Musli Kayyım, Ahmed Çelebi b. Süleyman, Mahmud b. Mehmed, el-Hâc Sefer Bâli? Efendi, el-Hâc Ramazan [b.] Mehmed, Mustafa Çelebi b. Receb, Ahmed Yazıcı b. Mehmed, Hüseyin b. Mirza ve gayruhüm.