Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 403 Hüküm no: 539 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı İbrahim b. Bayram’ın kölesi Rıdvan b. Abdullah’ı azat ettiği. Mahmiye-i Galata’da Câmi‘-i Kebîr mahallesinde sâkin keresteci el-Hâc İbrahim b. Bayram nâm kimesne meclis-i şer‘de mukaddemâ kendiye rıkkını mu‘terif olan işbu orta boylu gök elâ gözlü Rusiyyü’l-asl hâfız hâze’l-kitâb Rıdvan b. Abdullah mahzarında ikrâr ve takrîr-i kelâm edip ıtk-ı rakabât a‘zam-ı kurbât ve vesîle-i ref‘-i derecât ve sebeb-i duhûl-i cennât-ı âliyât olduğundan mâ‘adâ mu‘tıkın cemî‘ uzvu nârdan âzâd olduğunu nâtık hadîs-i şerîfin mefhûmuna muttali‘ olmağın mevsûf-ı mezbûru silk-i mülkümde münselik olduğu hâlde târih-i kitâbdan üç sene mukaddem hasbeten lillâhi te‘âlâ ve haseneten li rûhi resûlihi’l-mu‘allâ tahrîr ve i‘tâk ve zümre-i ahrâr-ı asliyyîne idrâc [ve] ilhâk etmişidim mevsûf-ı mezbûr Rıdvan târih-i mezkûrdan beri sâir ahrâr-ı asliyyîn gibi hür olup üzerinde hakk-ı velâdan gayrı hakkım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Es-Sâbıkūn.