Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 63 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf’un, merhum İbrahim’den kendisine intikal eden tereke hissesini Ayşe Hatun’dan teslim aldığı Husûs-ı âtiˈz-zikrin mahâllinde istimâ‘ ve tahrîri içün bu fakīre hitâben buyruldu-yı şerîf vârid olmağın imtisâlen lehû bu dâ‘îleri dahi mahmiye-i İstanbulˈda Balaban Ağa mahallesi sükkânından iken bundan mukaddem vefât edip verâseti zevce-i metrûkesi Âişe Hatun bt. el-Hâc Rasûl ile li-ebeveyn ammisi oğlu el-Hâc Yusuf b. el-Hâc Halil nâm kimesneye münhasıra olduğu şer‘an mütehakkık olan el-Hâc İbrahim b. el-Hâc Nurullahˈın mahalle-i mezbûrede sâkine olduğu menziline varıp zeyl-i kitâbda esâmîsi mastûr olan Müslimîn ile akd-i meclis-i şer‘-i hatîr eylediğinden sonra mezbûr el-Hâc Yusuf meclis-i ma‘kūd-ı merkūmda râfia‘-i hâzeˈl-kitâb zikri sebk edip tereke-i müteveffâyı mezbûre biˈl-verâse vâzi‘uˈl-yed olan zevce-i mezkûre Âişe Hatun mahzarında ikrâr ve takrîr-i kelâm edip mevrûsum müteveffâ-yı mezbûr el-Hâc İbrahimˈin muhallefâtından biˈl-ırsiˈş-şer‘î bana isâbet ve intikāl eden nükūd ve urûz ve akār vesâir evânî-i nühâsiye ve gayr-ı nühâsiyeden kalîl ve kesîr ve celîl ve hakīr hisse-i irsiyemi mezkûre Âişe Hatun yedinden biˈt-tamam veˈl-kemâl ahz u kabz eyledim ba‘deˈl-yevm muhallefât-ı müteveffâ-yı merkūmda vechen mineˈl-vücûh ve sebeben mineˈl-esbâb hak ve alâkam kalmadı dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈl-hâmisi aşer min-şehri Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Sâbıkūn