Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 63 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Halil’e ait evin Ayşe Hatun’a satıldığı Yâ Fettâh ve Yâ Rezzâk Husûs-ı âti’z-zikrin mahâllinde istimâ‘ ve tahrîri içün bu fakīre hitâben buyruldu-yı şerîf vârid olmağın imtisâlen lehû bu dâ‘îleri dahi mahmiye-i İstanbul’da Balaban Ağa mahallesi sükkânından iken bunda akdem vefât edip verâseti zevce-i metrûkesi Âişe Hatun bt. el-Hâc Rasûl ile li-ebeveyn ammisi oğlu el-Hâc Yusuf b. el-Hâc Halil’e münhasıra olduğu şer‘an mütehakkık olan merhûm el-Hâc İbrahim b. el-Hâc Nurullah’ın mahalle-i mezbûrede hayatında sâkin olduğu menziline varıp zeyl-i kitâbda esâmîsi mastûr olan Müslimîn ile akd-i meclis-i şer‘-i hatîr eyledikden sonra mezbûr el-Hâc Yusuf meclis-i ma‘kūd-ı mezkûrda râfia‘-i hâze’l-kitâb merkūme Âişe Hatun mahzarında ikrâr-ı tâm ve takrîr-i kelâm edip akd-i câ’î sudûruna değin mülk-i mevrûsum olup mahalle-i mersûmede vâki‘ bir tarafdan Hasan Çelebi tasarrufunda olan merhûm Şehîd Ali Paşa Vakfı ve bir tarafdan ba‘zan merkūme Âişe Hatun tasarrufunda olan vakıf arsa ve ba‘zan Mehmed Beşe nâm kimesne tasarrufunda olan merhûme Kamer Hatun Vakfı ve bir tarafdan yine ba‘zan merhûme Kamer Hatun Vakfı ile tarîk-i âm ve taraf-ı râbi‘i kezâlik tarîk-i âm ile mahdûd ve mümtâz olan menzilini bi-cemî‘i müştemilât bin kıt‘a esedî guruşa mezkûre Âişe Hatunˈa bey‘-ı bâtt-ı şer‘î ile bey‘ ve teslîm ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr bin esedî guruşu mezbûre Âişe Hatun yedinden tamamen ahz u kabz eyledim ba‘deˈl-yevm menzil-i mahdûd-ı mezkûrda ve müştemilâtında vechen mineˈl-vücûh ve sebeben mineˈl-esbâb hak ve alâkam kalmayıp merkūme Âişe Hatunˈun mülk-i müşterâsı ve hakk-ı sırfı olmuşdur dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈt-tâsi‘-i aşer min-şehri Zilka‘detiˈş-şerîfe li-sene selâse ve semânîn ve elf. Şuhûdüˈl-hâl: Fahrüˈl-akrân Hasan Ağa b. Hamza, Fahrüˈt-tüccâr el-Hâc Mehmed b. Abdülgani, el-Hâc Mustafa b. el-Hâc Abdurrahman, Mahmud b. Ahmed, Abdullah b. Hüseyin, Mehmed Beşe b. Ali, el-Hâc Ebûbekir b. el-Hâc İsmail