Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 74 Hüküm no: 10 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Dürrî Mehmed Bey’in karısı ve çocuklarının vasîsi Ayşe bt. İslam’a intikal eden terzi dükkânının, merhumun borçlarının ödenmesi için Ümmühani’ye satıldığı Mahrûse-i Galata muzâfâtından kasaba-i Paşaˈda Câmi‘-i Kebîr mahallesi sükkânından iken bundan akdem vefât eden Dürrî Mehmed Bey b. Mustafaˈnın verâseti zevce-i metrûkesi Emine bt. İbrahim ile sagīr oğlu Ali ve sagīre kızı Emetullahˈa münhasıra olduğu şer‘an zâhir ve müte‘ayyin oldukdan sonra merkūme Emine ile sagīrân-ı mezbûrânın tesviye-i emirlerine savb-ı şer‘den mansûb vasîsi olan ceddeleri Âişe bt. İslâm meclis-i şer‘-i şerîfde işbu bâ‘isetüˈl-vesîka Ümmühani bt. Hüseyin nâm hatunun zevci ve tarafından ikrâr-ı câ’iˈz-zikri tasdîka vekîl olup nehc-i mu‘teber-i şer‘î üzre vekâleti sâbite el-Hâc İbrahim b. Ramazan mahzarında her biri asâleten ve vesâyeten ikrâr ve takrîr-i kelâm edip müteveffâ-yı mezbûrun düyûn-ı kesîre-i müsbetesi olup tereke-i menkūlesi düyûnuna vefâ etmemekle emlâkinden olup mahalle-i mezbûrede dört kuyu kurbünde vâki‘ bir tarafdan Mehmed Çelebi b. Davud mülküne ve bir tarafdan müşteriye-i mezbûrenin âhar mülküne ve bir tarafdan ba‘zan müteveffâ-yı mezbûrun âhar mülküne ve ba‘zan mezbûre Ümmühani mülküne ve bir tarafdan tarîk-i âmma müntehî iki kepenk mülk terzi dükkânı dahi semen-i misli ile âhara bey‘ olunmak [3b] lâzım gelmeğin biˈl-izniˈş-şer‘î dükkân-ı mezkûr sûk-ı sultânîde hâssa münâdîlerinden el-Hâc Mustafa yediyle ba‘deˈn-nidâ ve beyneˈt-tâlibîn müzâyede olundukda merkūme Ümmühani üzerinde yüz altmış esedî guruşda karâr ve ziyâde ile tâlib-i âhar zuhûr etmediğinden mâ‘adâ meblağ-ı mezbûr yüz altmış esedî guruşa zarûre-i deyn-i mezkûre içün müvekkile-i mezbûre Ümmühaniˈye asâleten ve vesâyeten bey‘-ı bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm eyledikden sonra semeni olan meblağ-ı mezbûru merkūme Ümmühani Hatun yedinden her birimiz asâleten ve vesâyeten kabz eyledik ba‘deˈl-yevm dükkân-ı mezbûr müvekkile-i mezbûre Ümmühaniˈnin mülk-i müşterâsıdır hasbemâ teşâ ve tahtâr mutasarrıfa olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈs-sânî veˈl-işrîn min-Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Mehmed Çelebi b. Davud, İbrahim Çelebi b. el-Hâc Mehmed, Mehmed Çelebi b. Mustafa, İbrahim Çelebi b. Hüseyin, Hasan Beşe b. Abdullah, Osman Beşe b. Ramazan, Hasan Çelebi b. ( ), Mehmed b. Mustafa, Mahmud b. Ömer, Ahmed b. Osman