Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 81 Hüküm no: 19 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’un, kocasından kalan malların tahsili için vekil tayin eylediği Ahmed Beşe’nin topladığı alacakları kendi masrafına harcadığı Mahrûse-i Galata dâhilinde Sultân Bâyezid sâkinelerinden Sâliha bt. Abdullah nâm hatun tarafından husûs-ı âtiˈz-zikri da‘vâ ve taleb ve ahz u kabz ve kendüye isâle vekîl olup vekâleti nehc-i şer‘î ve vech-i mer‘î üzre sâbite olan bâ‘is-i hâzeˈl-kitâb Mehmed Çavuş b. Abdullah meclis-i şer‘-i hatîrde bundan akdem mahalle-i mezbûre sükkânından iken vefât eden ve merhûme Sâlihaˈnın zevci Kazgancı Ahmed Beşe b. Seferˈin evlâd-ı sıgārına vasîyy-i muhtâr olan Bestan Beşe b. ( ) nâm kimesne mahzarında üzerine biˈl-vekâle da‘vâ ve takrîr-i kelâm edip mal-ı mevrûsu olup mahmiye-i İstanbulˈda Topkapısı kurbünde Arpaemini mahallesi sükkânından Hasan Beşe b. Haydar nâm kimesnenin yedinde biˈl-emâne mazbût olan akçesi ahz u kabz ve kendüye îsâle zevci müteveffâ-yı mezbûr Ahmed Beşeˈyi hayatında tevkîl ol dahi ba‘de kabûliˈl-vekâle [5a] meblağ-ı mezbûru merkūm Ahmed Beşeˈden ahz ve kendi masârifine[sarf] ve istihlâk edip kableˈl-edâ vefât etmekle meblağ-ı müstehlek-i merkūmu hâlâ terekesinden taleb ederim suâl olunsun dedikde gıbbeˈs-suâl ve akībeˈl-inkâr ve isre-talebiˈl-beyyine udûl-ı Müslimînˈden olup zikri sebk eden Arpaemini mahallesi sükkânından Hasan Efendi b. Mehmed ve Tophâne mahallâtından Çukur Cum‘a mahallesi sâkinlerinden Mustafa Beşe b. Mehmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müvekkile-i mezbûre Sâliha Hatun zevci müteveffâ-yı mezkûrun Ahmed Beşeˈnin hayatında mal-ı mevrûsu olup mahmiye-i mezbûre Topkapısı kurbünde Arpaemini mahallesinde sâkin Hasan Beşe yedinde biˈl-emâne mazbût olan otuz bin sekiz yüz on akçesini ahz u kabz ve kendüye isâle mezbûre Ahmed Beşeˈyi tevkîl edip ol dahi ba‘deˈl-kabûl meblağ-ı mezbûru mezkûr Hasan Beşe yedinden vech-i meşrûh ahz u kabz eyledi biz bu husûsa bu vech [üzere] şâhidiz şehâdet dahi ederiz deyü her biri edâ-i şehâdet-i şer‘iye eylediklerinde gıbbe riâyeti şerâyitiˈl-kabûl şehâdetleri makbûle oldukdan sonra müvekkile-i mezbûrenin meclis-i şer‘a huzûr-ı âdî olmamağla li-ecliˈt-tahlîf küttâb-ı mahkemeden Ömer Efendi irsâl ol dahi mezbûrenin sâkine olduğu Sultân Bâyezid mahallesinde vâki‘ menziline varıp zeyl-i kitâbda esâmîsi mastûr olan Müslimîn ile akd-i meclis eylediğinden sonra meblağ-ı mezbûru küllen ve ba‘zan ahz u istifâ ve tatarruk-ı şer‘iyeden bir tarîk ile zimmetini ibrâ etmediğine mezbûre Sâlihaˈya vech-i şer‘î üzre yemîn-i billâh-i te‘âlâ vermeğin mûcebiyle ba‘deˈl-hükm mâ vaka‘a biˈt-taleb ketb olundu. Fî-evâhir-i şehr-i Zilhicce li-sene selâse ve semânîn ve elf. Şuhûdüˈl-hâl: Hüseyin Efendi el-imâm, İsa Bey b. Halil Muhzırbaşı, Hüseyin b. Ali, Ahmed Çelebi b. Abdullah, Ömer Çelebi el-kâtib