Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 80 Hüküm no: 18 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Beşe’nin, kölesi Hüseyin’i ölmeden önce azat ettiği İşbu orta boylu, açık kaşlı, gök gözlü, Rusiyyüˈl-asl bâ‘isüˈl-kitâb Hüseyin b. Abdülvahhab nâm gulâm meclis-i şer‘-i hatîr-i lâzımüˈt-tevkīrde mahmiye-i Galata ve Câmi‘-i Kebîr mahallesinden olup Tunusˈdan gelirken bundan akdem garîkan vefât eden Mehmed Beşe b. Abdullahˈın verâseti metrûkesi Emine bt. Hasan Beşe ile sulbî sagīr oğlu Hasan ve kebîr kızı Ümmühani nâm hatuna münhasıra olduğu şer‘an zâhir ve müte‘ayyin oldukdan sonra sagīr-i mezbûrun tesviye-i emrine min-kıbeliˈş-şer‘iˈl-mergūb mansûb vasîsi olup tereke-i müteveffâ-yı mezbûra vâzi‘uˈl-yed olan zahrüˈs-sa‘âdât es-Seyyid el-Hâc Mehmed Çelebi b. es-Seyyid Hamid mahzarında üzerine da‘vâ ve takrîr-i kelâm edip ben müteveffâ-yı mezbûrun abd-i memlûku olup mülkünde olduğum hâlde Tunusˈdan gelirken Midilli adasında Çömlekköyü nâm karyede hâl-i hayatında hasbeten-lillâh-i te‘âlâ mülkünden ifrâz ve ihrâc ve zümre-i ahrâra ilhâk ve idrâc edip ve Müslimînˈi işhâd dahi etmişken hâlâ vasî-i mezbûr bana rık olmak nâ-hak vaz‘-ı yed edip suâl olunup sebîlim tahliye ve üzerimden yed-i âdiyesini nez‘ olunmak matlûbumdur dedikde gıbbeˈs-suâl veˈl-inkâr merkūm Hüseyinˈden müdde‘âsını mübeyyine beyyine taleb olundukda udûl-ı Müslimînˈden olup mahmiye-i mezbûrede Bereketzâde mahallesinde sâkin Nazaroğlu Yazıcısı demekle şehîr Fazlullah Beşe b. Mehmed nâm kimesne li-ecliˈş-şehâde meclis-i şer‘a hazır olup isreˈl-istişhâd fiˈl-hakīka müteveffâ-yı mezbûr hâl-i hayatında Midilli adasında Çömlekköyü nâm karyede abd-i memlûku olan gulâm-ı mezkûr Hüseyinˈi hasbeten-lillâh-i te‘âlâ benim huzûrumda i‘tâk edip beni işhâd eyledi ben bu husûsa şâhidim şehâdet dahi ederim deyü edâ-i şehâdet-i şer‘iye eyledikden sonra yine mahmiye-i mezbûrede Alaca Mescid mahallesindeki sâkin tüccâr veˈl-iktidârdan el-Hâc Mustafa b. Mehmed ve mârrüˈz-zikr Câmi‘-i Kebîr mahallesinde sâkin Mehmed Çelebi b. Ali nâm kimesneler dahili-ecliˈş-şehâde meclis-i şer‘a hâzırân olup gıbbeˈl-istişhâdiˈş-şer‘î fiˈl-vâki‘ mahmiye-i mezbûre hısnı ebvâbından Kireçkapısı kurbünde Sultân Bâyezid mahallesinde sâkin olup şâhid-i asl olan el-Hâc Mehmed b. el-Hâc Yusuf nâm kimesne kezâlik müteveffâ-yı merkūm hâl-i hayatında Midilli adasında Çömlekköy nâm karyede abd-i memlûku olan mevsûf-ı mezbûr Hüseyinˈi hasbeten-lillâh-i te‘âlâ benim huzûrumda i‘tâk edip beni işhâd eyledi ben bu husûsa şâhidim şehâdet dahi ederim lâkin ben hâlâ âhar diyâra müteveccih olmağla siz dahi benim lisândan şâhidler olup şehâdet edin deyü şehâdetini her birimize tahmîl eyledikde biz dahi tahammül ve kabûl etmekle merkūmel-Hâc Mehmedˈin lisânından vech-i muharrer üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûl oldukdan sonra mûcebiyle gulâm-ı mezbûrun sebîli tahliye ve ıtkına ba‘deˈl-hükm mâ vaka‘a biˈt-taleb ketb olundu. Fiˈl-işrîn min-Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Ömer Efendi b. Ali el-imâm, el-Hâc Hasan b. Hasan, el-Hâc Hüseyin b. Abdullah el-attar, el-Hâc Abdülfettah b. Mehmed, Mustafa Çelebi b. Mehmed, Salih Çelebi b. Ahmed