Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 90 Hüküm no: 25 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin, merhum Ahmed Ağa’nın zimmetindeki köle bahalarından alacağını varislerden talep ettiği İşbu bâ‘isüˈl-vesîka Mehmed Çelebi b. el-Hâc Osman el-yesârî meclis-i şer‘-i şerîfde medîne-i Hazret-i Ebâ Eyyûbeˈl-Ensârî mahallâtından Baba Haydar mahallesinde sâkin iken bundan akdem vefât eden Ahmed Ağa b. Kurdˈun verâseti zevce-i metrûkesi Fâtıma bt. Halil ile sülbî sagīr oğulları Mehmed ve Murad ve Süleyman ve Mustafa ve İbrahim ile ve sulbiye kebîre kızı Hamide ve Râziye ve sagīre kızları Rahime ve Emine ve Emetullah ve Hadîce ve Havvaˈya münhasıra olduğu şer‘an zâhir ve müte‘ayyin oldukdan sonra sıgār-ı mezkûrînin tesviye-i emirlerine kıbel-i şer‘den mansûb vasîleri olup tereke-i müteveffât-ı mezbûra vâzi‘uˈl-yed olan Salih Çelebi b. Murad ile merkūmât Rahime ve Emine ve Emete ve Hadiceˈnin kezâlik tesviye-i emirlerine savb-ı şer‘den nasb olunan vasîleri vâlideleri merkūme Fatma mahzarında üzerlerine da‘vâ ve takrîr-i kelâm edip târih-i kitâbdan on iki sene mukaddem müteveffâ-yı mezbûre mülküm olan Mevlûde zevcesiyle ve üç oğlu ve bir kızıyla bir Kazak gulâmımı iki yüz seksen esedî guruşa bey‘ ve teslîm ol dahi ba‘deˈl-iştirâ ve tesellüm semenleri olan meblağ-ı mezbûrun bir def‘a altmış iki ve bir def‘a elli beş ve bir altmış ve bir def‘a yirmi iki ve bir def‘a on beş ve bir def‘a yedi ve bir def‘a sekiz esedî guruş ki cem‘an iki yüz yirmi dokuz esedî guruşunu alıp bâkī elli bir esedî guruş kableˈl-istifâ vefât etmekle hâlâ meblağ-ı mezbûru mezbûrân vasîlerin yedlerinde olan terekesinden taleb ederim suâl olunsun dedikde gıbbeˈs-suâl veˈl-inkâr müdde‘î-i mezbûrdan müdde‘âsına beyyine taleb olundukda yine medîne-i mezbûrda Câmi‘-i Kebîr mahallesinden Veys Beşe b. Mehmed Vakfıˈndan Müstecib mahallesinden Şa‘bân Beşe b. Osman nâm kimesneler li-ecliˈş-şehâde meclis-i şer‘a hâzıran olup isre-istişhâd fiˈl-vâki‘ müdde‘î-i mezbûr târih-i merkūmdan müteveffâ-yı mezbûre bizim huzûrumuzda mârrüˈz-zikr Mevlûde zevcesi ve üç oğlu ve bir kızı ile bir Kazak gulâmımı iki yüz seksen esedî guruşa bey‘ ve tesellüm ol dahi iştirâ ve tesellüm eyledi biz bu husûsa şâhitleriz şehâdet dahi ederiz deyü her biri edâ-yı şehâdet-i şer‘iye eylediklerinde isre-ri‘âyeti şerâyitiˈl-kabûl şehâdetleri makbûle oldukda müdde‘î-i mezbûr ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fî-sâdis ve işrîn min-Zilhicce-i şerîfe li-sene selâse ve semânîn ve elf. Şuhûdüˈl-hâl: Esad Çelebi b. Mesud Efendi, Ebû Suûd Çelebi b. Mesud Efendi, Mehmed Beşe b. Hasan, Mehmed Çelebi b. Hasan, Bayram Çelebi b. İbrahim, Mehmed Çelebi b. Mehmed, Mehmed Çelebi b. Mustafa, Mustafa b. Mehmed Müteveffâ-yı mezbûrun Kemâliye kazâsında zimmetinde olup hâlâ es-Seyyid Mustafa Çelebi yediyle gelip huzûr-ı şer‘de vasî Rahime Hatunˈa teslîm olunan esedî 420 fî 120 yekûn 50400 Minhâ Deyn li-Rahime el-mezbûre aniˈl-karz esedî 100 12000 Deyn-i müsbet li-Abdurrahman Çelebi esedî 11 1320 Resm-i âdî 570 Kalemiye 190 Kassâmiye 190 Yekûn 14270 Sahhuˈl-bâkī 36130 [6b] Hisse-i zevce 4516 Hisse-i ibn 10538 Hisse-i ibn 10538 Hisse-i ibn 10538 Müteveffât-ı mezbûrenin sonradan gelen mâldan hisse-i şer’iyyesi 4516 Hisse-i ibn 1505 Hisse-i ibn 1505 Hisse-i ibn 1505