Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 91 Hüküm no: 26 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Rahime Hatun’un, merhum Hüseyin Çelebi’deki alacağını varislerden talep ettiği Mahrûse-i Galata muzâfâtından kasaba-i Tophâneˈ[de] el-Hâc Memi mahallesinde sâkine bâ‘isetüˈl-vesîka Şerife Rahime Hatun bt. es-Seyyid Hasan meclis-i şer‘de mahalle-i mezbûrede sâkin iken bundan akdem vefât eden es-Seyyid Hüseyin Çelebi b. es-Seyyid Mehmedˈin sülbî sagīr oğulları es-Seyyid Hasan ve es-Seyyid Mustafa Çelebiˈnin tesviye-i emirlerine kıbel-i şer‘den mansûb vasîleri olup tereke-i müteveffâ-yı mezbûra vâzi‘uˈl-yed olan el-Hâc Hüseyin Efendi mahzarında üzerine da‘vâ ve takrîr-i kelâm edip müteveffâ-yı mezbûrun zimmetinde cihet-i karzdan olan yüz otuz esedî guruş hakkımın otuz guruşunu yedinden hayatında alıp bâkī yüz esedî guruşumu kableˈl-istifâ vefât edip hâl-i hayatında meblağ-ı mezbûr zimmetinde bana deyni olduğunu alâ-ruûsi’l-işhâd ikrâr ve işhâd etmekle hâlâ vasî-i mezbûrun yedinde olan terekesinden taleb ederim suâl olunsun dedikde gıbbeˈs-suâl veˈl-inkâr merkūme Şerifeˈden müdde‘âsını mübeyyin beyyine taleb olundukda udûl-ı Müslimînˈden es-Seyyid Mehmed Çelebi b. es-Seyyid Ahmed ve Mehmed Bey b. Sefer nâm kimesneler li-ecliˈş-şehâde meclis-i şer‘a hâzırân olup [olup] isre’l-işhâd fiˈl-vâki‘ müteveffâ-yı mezbûr hayatında merkūme Şerif Rahime Hatunˈdan yüz otuz esedî guruş istikrâz ve kabz edip hâlâ zimmetimde deynimdir deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyeti şerâyitiˈl-kabûl şehâdetleri makbûle oldukdan sonra müdde‘iyye-i mezbûre ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈl-hâmis-i aşer min-Muharremiˈl-harâm li-sene erba‘a ve semânîn ve elf. Şuhûdüˈl-hâl: es-Seyyid Mustafa Ağa b. es-Seyyid Mehmed, el-Hâc Abdullah b. el-Hâc Yahya, Abdülbaki Çelebi b. Hasan, Sefer Çelebi b. Abdurrahman, el-Hâc Abdi b. Hasan