Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 96 Hüküm no: 34 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide’nin, merhume annesi Fatma’ya, babası Ahmed Ağa’dan intikal eden terekedeki mehir alacağından payına düşen kısmı talep ettiği Medîne-i Hazret-i Ebâ Eyyûbeˈl-Ensârî -aleyhi rahmetüˈl-Bârî- mahallâtından Baba Haydar mahallesinde sâkin iken bundan akdem vefât eden Ahmed Ağa b. Kurdˈun verâseti zevce-i metrûkesi Fatma bt. Halil ile sülbî sagīr oğulları Mehmed ve Mustafa ve Murad ve Süleyman ve Şit ve İbrahim ve sulbiye-i kebîre kızları Hamide ve Râziye ve sagīre kızları Rahime ve Emine ve Emetullah ve Hadîce ve Havvaˈya münhasıra oldukdan sonra işbu bâ‘isüˈl-kitâb zahrüˈl-muhadderât müşârün-ileyhâ Hamide Hatun meclis-i şer‘-i hatîrde sıgār-ı mezkûrîn Mehmed ve Murad ve Süleyman ve Şit ve Mustafa ve İbrahim ile merkūme Havvaˈnın tesviye-i emirlerine savb-ı şer‘den mansûb vasîleri olup tereke-i müteveffâ-yı mezbûre vâzi‘uˈl-yed olan Salih Çelebi b. Murad ile mezkûrât Rahime ve Emine ve Emetullah ve Hadiceˈnin kezâlik tesviye-i umûrlarına kıbel-i şerî‘at-i mergūbeden nasb olunan vasîleri ve vâlideleri olan mezbûre Fatma mahzarında üzerlerine da‘vâ ve takrîr-i kelâm edip anam olup bundan akdem vefât eden Fatma bt. Ali nâm hatun babam müteveffâ-yı mezbûrun otuz bin akçe mehr-i müeccel tesmiyesiyle zevcesi olup kableˈl-ahz fevt olmağla verâseti bana ve âhar kızı Âişe ve zevci ve müteveffâ-yı mezbûr Ağaˈya münhasıra olmağla meblağ-ı mezbûr otuz bin akçeden benim hisseme isâbet eden on bir bin iki yüz elli akçe hakkım babam müteveffâ-yı merkūmân vasîlerden yedlerinde olan müteveffâ-yı mezbûr Ahmed Ağa’nın terekesinden taleb ederim suâl olunsun dedikde gıbbeˈs-suâl veˈl-inkâr müdde‘î-i mezbûreden müdde‘âsına beyyine taleb olundukda medîne-i mezbûrda Servi mahallesinde sâkin Nalband Mehmed b. Halil ve medîne-i mezbûreye tâbi‘ Ayaz Ağa nâm karyeden Mustafa b. Mehmed nâm kimesneler li-ecliˈş-şehâde meclis-i şer‘a hâzırân olup isreˈl-işhâd fiˈl-vâki‘ müteveffâ-yı mezbûr Ahmed Ağa müdde‘iyye-i mezbûrenin anası müteveffâ-i merkūme Fatmaˈyı bizim huzûrumuzda otuz bin akçe mehr-i müeccel üzerine tezevvüc eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyeti şerâyitiˈl-kabûl şehâdetleri makbûle oldukdan sonra müdde‘iyye-i mezbûre hissesine isâbet eden meblağ-ı mezbûr on bir bin iki yüz elli akçeden babası müteveffâ-yı mezbûrdan küllen ve ba‘zan ahz ü istifâ veyâ hîbe veyâ havâle ve turûk-ı şer‘iyeden bir tarîkle zimmetini ibrâ etmediğine yemîn teklîf olundukda ol dahi hasebüˈl-mesûl yemîn-i billâh-i te‘âlâ ettikden sonra mûcebiyle hüküm birle mâ vaka‘a biˈt-taleb [ketb] olundu. Fiˈl-yevmiˈs-sâdis veˈl-işrîn min-Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Mâ-sebak