Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 103 Hüküm no: 40 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferde ölen Mehmet Bey’in karısı Hatice’nin, kendisi, oğlu ve kızının hisselerine isabet eden terekeyi vasî Mehmet Bey’den tahsil ettiği Mahrûse-i Galata muzâfâtından kasaba-i Tophâneˈde Kâtib Mustafa Çelebi mahallesinden olup hâssa münâdîlerinden iken seferde fevt olan Mehmed Bey b. Abdullah nâm kimesnenin verâseti zevceteyn-i metrûketeyni Hadîce bt. Abdullahˈa ve Âişe bt. Abdullah nâm hatunlar ile sulbî sagīr oğulları Ahmed ve Mahmud ve Hüseyin ve Mustafa ve sagīre kızı Fatmaˈya münhasıra olduğu şer‘an zâhir ve müte‘ayyin oldukdan sonra merkūme Hadîce meclis-i şer‘-i şerîfde sıgār-ı mezbûrînin kıbel-i şer‘den mansûb vasîleri olup tereke-i müteveffâyı mezbûre biˈl-vesâye vâzi‘uˈl-yed olan işbu bâ‘isüˈl-kitâb Mehmed Bey b. Mehmed mahzarında ikrâr ve takrîr-i kelâm edip zevcim müteveffâ-yı mezbûrun ve ba‘dehû vefât eden sulbî oğlu Ahmedˈin terekelerinden ber-mûceb-i kassâm-ı askerî benim hisse-i şer‘iyeme isâbet eden ve mezbûr Ahmedˈin kız karındaşı olup firâşımdan hâsıla işbu sagīre Ümmühaniˈnin hissesine isâbet eden min-haysüˈl-mecmû‘ yüz kırk altı akçeyi merkūm Mehmed Bey yedinden tamamen ahz u kabz eyledim min-ba‘d zevcim müteveffâ-yı mezbûrun ve oğlum Ahmedˈin terekelerine müte‘allika vechen mineˈl-vücûh da‘vâ ve nizâ‘ım ve alâka ve medhalim kalmadı dedikde gıbbeˈt-tasdîkiˈş-şer‘iyiˈl-mu‘teber mâ vaka‘a biˈt-taleb ketb olundu. Fiˈl-âşir min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Ömer Efendi b. Ali, Mehmed Çavuş b. Abdullah, Mustafa Çelebi b. Mehmed, Ekinci Mustafa Çelebi b. Yusuf, Ahmed b. Osman, Ali Bey b. Halil