Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 103 Hüküm no: 39 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Himmet’in, İstavrozlu Ahmed Çelebi’nin zimmetindeki alacağının vasî Rabi tarafından tahsil edildiği Mahrûse-i Galataˈya tâbi‘ kasaba-i Tophâneˈde Süheyl Bey mahallesinde sâkin iken bundan akdem vefât eden el-Hâc Himmet b. Mustafaˈnın verâseti zevceteyn-i metrûketeyn Râbia bt. Ali ve Belkıs bt. Abdullah nâm hatunlara ve sulbî sagīr oğulları Yahya ve Süleyman ve sagīre kızları Fatma ve Rukiyeˈye münhasıra olduğu şer‘an zâhir ve müte‘ayyin oldukdan sonra sıgār-ı mezkûrînin tesviye-i emirlerine min-kıbeliˈş-şer‘iˈş-şerîf mansûb vasîleri olan mezbûre Râbia meclis-i şer‘-i şerîfde işbu bâ‘isüˈl-kitâb İstavrozlu Ahmed Çelebi b. Hasan mahzarında biˈl-vesâye ikrâr ve takrîr-i kelâm edip müteveffâ-yı mezbûrun merkūm Ahmed Çelebi zimmetinde bir re’s bargir semeninden iki bin beş yüz akçe ve cihet-i karzdan üç bin akçe ki cem‘an beş bin beş yüz akçe hakkı olup meblağ-ı mezbûru kableˈl-ahz fevt olmağla zimmetinde kalmağın hâlâ meblağ-ı mezbûru asâleten ve vesâyeten merkūm Ahmed Çelebi yedinden tamamen ahz u kabz eyledim dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-âşir min-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mustafa Beşe b. Mehmed, Ali Beşe b. Mustafa, Rasûl Halîfe b. Ali, Hüseyin Çelebi b. Mercan, Mustafa Beşe b. Ahmed, Ahmed b. Osman