Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 145 Hüküm no: 66 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Muharrem Beşe’den varislerine kalan evin, varisler tarafından Afife bt. Haydar’a satıldığı Galataˈda vâki‘ Musa mahallesi sükkânından iken bundan akdem vefât eden Muharrem Beşe b. ( ) nâm kimesnenin zevce-i metrûkesi Hâce Hatunˈa ve li-üm kız karındaşı Sâliha bt. Hüseyinˈe ve velâ-i itâka cihetinden el-Hâc Durmuş Ağa ile Ali Reis b. Mehmed nâm kimesnelere münhasıra ve asıl mes’eleleri on iki şehimden i‘tibâr olunup sihâm-ı mezbûreden üç sehmi zevcesi mezkûre Hâce Hatun’a ve iki sehmi mezbûre Sâlihaˈya ve yedi sehminin dahi nısfı merkūmel-Hâc Durmuş Ağaˈya ve nısf-ı âharı mezkûr Ali Reisˈe isâbet eylediği şer‘an zâhir ve mütehakkık oldukdan sonra mezbûre Hâce Hatun ve Sâliha ve Durmuş Ağa asâleten ve mezbûr Ali Reis tarafından husûs-ı câ’iˈz-zikri ikrâra vekîl olup nehc-i şer‘î üzre vekâleti sâbite olan Ahmed b. Mehmed vekâleten meclis-i şer‘de râfi‘a-i hâzeˈl-kitâb Afife bt. Haydar nâm hatun kıbelinden husûs-ı âtiˈl-beyâna tasdîka vekîl-i sâbitüˈl-vekâlesi olan Ali Beşe b. Eyüb mahzarında her biri ikrâr ve takrîr-i kelâm edip akd-i âtî sudûruna değin mülk-i mevrûsumuz olup mahalle-i mezbûrede vâki‘ bir tarafdan Terzi Şa‘bân mülkü ve bir tarafdan mahalle-i mezbûre mescidi imâmına mevkūf menzil ve bir tarafdan Longazâde Vakfı ve taraf-ı râbi‘i tarîk-i hâssa müntehî olup fevkānî iki oda bir matbah ve bir sofayı ve tahtânî bir oda ve müşterek bi’r-i mâ’ı müştemil menzilde olan hisselerimizi müvekkile-i merkūme Afîfe Hatunˈa her birimiz alâ-ciheti safka ile min-haysüˈl-mecmû‘ iki yüz elli esedî guruşa bey‘ ve teslîm ol dahi tesellüm ve kabz eylediğinden sonra semeni olan meblağ-ı merkūm iki yüz elli esedî guruşdan tashîh-i sâbık üzere hisselerimize isâbet eden mikdârını her birimiz müşteriye-i mezkûre Afife Hatun yedinden tamamen ahz u kabz eyledik ba‘deˈl-yevm menzil-i mahdûd-ı mezkûrda vechen mineˈl-vücûh alâka ve medhalim kalmayıp mezbûre Afîfe Hatunˈun min-haysüˈl-mecmû‘ mülk-i mahzı ve hakk-ı sırfı olmuşdur dediklerinde gıbbeˈt-tasdîk mâ vaka‘a biˈt-taleb ketb olundu. Fî-evâhir-i şehriˈl-Muharremiˈl-harâm li-sene erba‘a ve semânîn ve elf. Şuhûdüˈl-hâl: Mahmud b. Mehmed el-müezzin, Mahmud Çelebi b. Mehmed, Ali b. Cafer, Yusuf Halîfe b. Ahmed, Abdülbaki b. Receb, Hacı Mustafa el-münâdî, Hüseyin b. Ali