Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 147 Hüküm no: 69 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Kazgancı Ahmed Beşe’nin terekesindeki bazı eşyaları sakladığı iddia edilen karısı Sâliha’nın, eşyaları vasiye teslim ettiği Husûs-ı âtiˈl-beyânın mahâllinde istimâ‘ ve tahrîr içün iltimâs olunmağın cânib-i şer‘-i şerîfden Ömer Efendi b. Ali irsâl olunup ol dahi mahmiye-i Galata dâhilinde Sultân Bâyezid mahallesinde sâkin iken bundan akdem fevt olan Kazgancı Ahmed Beşe b. Sefer nâm kimesnenin menziline varıp zeyl-i kitâbda mastûrüˈl-esâmî olan Müslimîn ile akd-i meclis-i şer‘ eylediklerinde müteveffâ-yı mezbûrun evlâd-ı sıgārına vasî-i muhtâr olan Bestan Beşe b. ( ) nâm kimesne meclis-i ma‘kūd-ı mezbûrda müteveffâ-yı mezbûrun zevc-i metrûkesi Sâliha bt. Abdullah mahzarında biˈl-vesâye üzerine da‘vâ ve takrîr-i kelâm edip müteveffâ-yı mezbûrun mezbûre Sâliha bir sîm bıçak ve bir garar yün ve bir sîm hâtem ve iki beledî döşek ve iki yorgan ve iki yasdık gılâfı ketm ve ihfâ eyledi suâl olunsun dedikde gıbbeˈs-suâl mezbûre Sâliha Hatun eşyâ-i mezbûreden bir sîm bıçak ve bir garâr yün ve bir sîm hâtem ve iki yasdık gılâfını meclis-i mezbûrda vasî-i merkūma teslîm mâ‘adâsını inkâr edicek vasî-i mezbûrdan müdde‘âsını beyyine taleb olundukda ityân-ı beyyineden izhâr-ı acz ve istihlâf ile mukābele etmeğin fiˈl-hakīka eşyâ-i mezbûreyi mezbûre Sâliha ketm ü ihfâ eylemediğine yemîn teklîf olundukda ol dahialâ-vefkiˈl-mesûl billâhiˈl-âlî eylediği mevlânâ-yı mezbûr mahâllinde tahrîr ba‘dehû ma‘an irsâl olunan Hüseyin Çelebi b. Ali ve Ahmed Beşe ile meclis-i şer‘a gelip alâ-vukû‘ihî inhâ ve takrîr etmeğin mûcebiyle bî-vech mu‘ârazadan vasî-i merkūm men‘ birle mâ vaka‘a biˈt-taleb ketb olundu. Fî-evâhir-i Zilhiccetiˈş-şerîfe li-sene selâse ve semânîn ve elf. Şuhûdüˈl-hâl: Ramazan Beşe b. Abdullah, Mehmed Çavuş b. Abdullah, Kirasçı Mustafa Çelebi, Ali Bey b. Halil, Hacı Efendi el-kâtib