Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 168 Hüküm no: 83 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi b. Hasan’ın evini ölmeden önce karısı Hatice bt. Habib’e hibe etmesi sebebiyle diğer varislerin ev hissesi taleplerinin reddedildiği Galata a‘mâlinden Kasımpaşaˈdabiˈl-fi‘il Câmi‘-i Kebîr imâmı Ahmed Efendi b. Hasan vefât edip verâseti zevce-i metrûkesi Hadîce bt. Habib ile sulbiye kebîre kızı ve sagīre kızları Emetullahˈa ve Fatma ve Havvaˈya münhasıra olduğu şer‘an mütehakkıka oldukdan sonra mezbûre Hadîce tarafından husûs-ı âtiˈl-beyâna da‘vâya vekîl olup nehc-i şer‘î üzre vekâleti sâbite olan bâ‘is-i hâzeˈl-kitâb İsmail b. Ali meclis-i şer‘-i hatîr-ilâzımüˈt-tevkīrde mezbûretân Fatma ve Havva nâm sagīrlerin tesviye emirlerine kıbel-i şer‘den mansûb vasîleri olan Şeyhî Mehmed Efendi b. Ramazan mahzarında biˈl-vekâle da‘vâ ve takrîr-i kelâm edip mezbûr Ahmed Efendi silk-i mülk-i sahîhinde münselik olup Cihangir mahallesinde vâki‘ etrâf-ı erba‘ası Ömer Yazıcı ve Kara Yazıcı İbrahim ve müvekkile-i mezbûrenin mülk-i müşterâsı tarîk-i âmma müntehî bir beyt-i süflî ve bir sofaya ve müşterek su kuyusunu müştemil menzilini hâl-i hayatında ve kemâl-i akl u sıhhatinde zevcesi müvekkile-i mezbûre Hadiceˈye hîbe ve teslîm ol dahi ittihâb ve kabz ve mukābele-i hibe-i mezbûrede merkūme Hadîce dahi emlâkinden bir çift küpe ve bir çift habbe altın bilezik ve bir sîm ön kuşak on ayaklı saçbağısını zevc-i vâhib-i mezbûr Ahmed Efendi yedine ivaz olmak üzre def‘ ve teslîm oldu eşyâ-yı mezkûre bi-vech-i meşrûh ahz u kabz edip mezbûr müvekkilem merkūmenin mülk-i mevhûb-ı mu‘avvazı olmuş iken hâlâ vâhib-i mezbûr fevt olmağla vasî-i mezkûr menzil-i mezbûru muhallefâtına idhâl murâd eder suâl olunup def‘ olunmak matlûbumdur dedikde gıbbeˈs-suâl ve akībeˈl-inkâr ve isre-talebiˈl-beyyine udûl-ı Müslimînˈden Küçük Piyalepaşa Câmii müezzini Ali Çelebi b. İbrahim ve Câmi‘-i Kebîr mahallesi sükkânından Ömer Çelebi b. Veli nâm kimesneler li-ecliˈş-şehâde meclis-i şer‘a hâzırân istişhâd olunduklarında fiˈl-hakīka müteveffâ-yı mezbûr Ahmed Efendi hâl-i hayatında ve kemâl-i akl u sıhhatinde silk-i mülkünde olup zikri sebk eden menzil-i mahdûdu zevcesi müvekkile-i mezkûre Hadîce Hatunˈa hîbe ve teslîm ve mezbûre Hadîce dahi ba‘deˈl-ittihâb veˈt-tesellüm emlâkinden bir çift küpe ve bir çift habbe altın bilezik ve bir sîm ön kuşak ve on ayaklı saçbağısını hîbe ve mezbûreye ivaz olmak üzre vâhib-i mezbûr Ahmed Efendi yedine def‘ ve teslîm ol dahi eşyâ-yı merkūmeyi vech-i meşrûh üzre ahz u kabz eyledi biz bu husûsa şâhidiz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle olmağın mûcebiyle ba‘deˈl-hükm mâ vaka‘a biˈt-taleb ketb olundu. Fî-evâil-i Saferiˈl-hayr li-sene erba‘a ve semânîn ve elf. Şuhûdüˈl-hâl: Ömer Efendi b. ( ) el-imâm, Hüseyin Beşe b. Mehmed, Süleyman Çelebi b. Hüseyin, Mehmed Çelebi b. Ali