Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 182 Hüküm no: 97 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Bey b. Abdullah’ın varislerinin, kendilerine intikal eden terekeyi vasî Mustafa Ağa’dan tahsil ettikleri Mahmiye-i Galata muzâfâtından Kal‘a-i Boğazkesen mahallâtından el-Hâc Kemâl mahallesinde sâkin iken bundan akdem vefât eden Hüseyin Bey b. Abdullahˈın verâseti zevce-i metrûkesi Emetullah bt. Hızır ile li-ebeveyn kız karındaşı Âişe ve li-ebeveyn karındaşı oğulları İsmail ve gāib Mehmedˈe münhasıra olduğu şer‘an zâhir oldukdan sonra merkūmetân Emetullah ve Âişe meclis-i şer‘de müteveffâ-yı mezbûrun sülüs mâlını vasî-i muhtâr olmağla kabz eden işbu bâ‘isüˈl-kitâb kal‘a-i mezbûre kethudâsı olan Mustafa Ağa b. Hüseyin mahzarında her biri ikrâr ve takrîr-i kelâm edip mezbûr Mustafa Ağa müteveffâ-yı mezbûrun mecmû‘-ı terekesinin ber-mûceb-i defter-i kassâm-ı askerî sülüsü olan kırk dört bin kırk akçe biˈl-vesâye kabz eyledikden sonra meblağ-ı mezbûru yedinde ancak beş bin akçe bâkī kalmağın merkūm Mustafa Ağa dahi meblağ-ı bâkī-i mezbûru vücûh-ı hayrâta sarfa berâ-yı vekîl edip bize teslîm etmeğin biz dahiba’deˈl-ahz veˈl-kabz sâir mesârifini mezkûrîn bize göstermekle sülüsân-ı mezkûrdan mezbûr Mustafa Ağa yedinde bir akçe bâkī kalmadı dediklerinde gıbbeˈt-tasdîk mâ vaka‘a biˈt-taleb ketb olundu. Fiˈl-hâmis-i aşer min-Safer sene [10]84 Şuhûdüˈl-hâl: es-Sâbıkūn