Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 195 Hüküm no: 107 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Hatice’nin beytülmala kalan evinin Siyavuş Hatun bt. Abdullah’a satıldığı Hâlâ mahrûse-i Galata ve tevâbi‘i emîn-i beytü’l-mâlı olan es-Seyyid Mustafa Ağa b. es-Seyyid Mehmed tarafından zikri câ’î husûsa vekîl-i müsecceli olan Halil Ağa b. Ömer meclis-i şer‘de işbu bâ‘isüˈl-kitâb el-Hâce Siyavuş Hatun bt. Abdullah tarafından ikrâr-ı âtîyi tasdîka vekîl olup mezbûrenin zâtını ma‘rifet-i şer‘iye ile ârifân Hüseyin Bey b. Mustafa ve Süleyman Bey b. Osman şehâdetleriyle şer‘an vekâleti sâbite olan Halil Bey b. Ömer mahzarında biˈl-vekâle ikrâr ve takrîr-i kelâm mahrûse-i mezbûre a‘mâlinden kasaba-i Tophâneˈde Ebufazl mahallesinde sâkine olup hâlâ diyâr-ı Mısriyyeˈde Medîne-i Reşdˈde vefât etip zâhirde vâris-i ma‘rûfu olmamağla terekesi beytü’l-mâle râci‘ olan el-Hâc Keyvan kızı demekle meşhûre Hadîce nâm hatunun mahalle-i mezbûrede vâki‘ tahdîd ve tavsîfden müstağnî mülk menzili cânib-i beytü’l-mâle intikāl etmekle müvekkilem merkūm dahi menzil-i mezbûru merkūme el-Hâce Siyavuşˈa tarafeynden îcâb ve kabûlü hâvî bey‘-ı bâtt-ı sahîh-i şer‘î ile altmış bin akçeye biˈl-emâne bey‘ ve teslîm edip ol dahi ba‘deˈl-iştirâ veˈt-tesellüm semeni olan meblağ-ı mezbûr altmış beş bin akçeyi müvekkile-i merkūme yedinden biˈt-tamam alıp ve kabz eyledi ba‘deˈl-yevm menzil-i mezbûr müvekkile-i mezbûrenin mülk-i müşterâsıdır keyfe mâ yeşâ’ mutasarrıfa olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-âşir min-Zilka‘detiˈş-şerîfe li-sene selâse ve semânîn ve elf. Şuhûdüˈl-hâl: Ali Ağa Kethudâ, Mahmud Çelebi b. Mehmed, Kasım Kâtib b. Topçu, Mustafa Beşe b. Abdullah