Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 196 Hüküm no: 108 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hasan Çelebi b. es-Seyyid Mehmed’in terekesinden, karısı Hacer bt. Ali’ye mehrinin verilmesi Mahmiye-i Galata a‘mâlinden kasaba-i Kasımpaşaˈda Yeldeğirmeni mahallesinde sâkin iken bundan akdem vefât eden Hasan Çelebi b. es-Seyyid Mehmedˈin verâseti zevce-i metrûkesi Hacer bt. Ali ile vâlidesi Fatma bt. Mansûra ve sulbî sagīr oğulları es-Seyyid Hüseyin Çelebi ve es-Seyyid Ali Çelebiˈye münhasıra olduğu şer‘an zâhir ve müte‘ayyin oldukdan sonra işbu bâ‘isüˈl-vesîka merkūme Hacer meclis-i şer‘de sagīrân-ı mezbûrânın ammileri ve kıbel-i şer‘den vasîleri olan es-Seyyid Abdülkadir Çelebi b. es-Seyyid Mehmed mahzarında üzerine da‘vâ ve takrîr-i kelâm edip müteveffâ-yı mezbûr zimmetinde mukarrer olan bin beş yüz akçe mehr-i müeccelimi kableˈl-ahz fevt olmağla hâlâ vasî-i mezbûrun yedinde olan terekesinden taleb ederim suâl olunsun dedikde gıbbeˈs-suâl ve akībeˈl-inkâr ve ba‘de talebiˈl-beyyine udûl-ı ricâlden mahalle-i mezbûre[de] müezzin olan Mehmed Halîfe b. İbrahim ve Hasan Çavuş b. İbrahim li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr merkūme Hacerˈi mehr-i müeccel üzerine huzûrumuzda tezevvüc ve kabûl eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mezbûre Hacer ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈl-hâmis-i aşer min-Saferiˈl-hayr li-sene erba‘a ve semânîn ve elf. Şuhûdüˈl-hâl: Ömer Efendi b. Ali, İsa Bey b. Halil, Ahmed b. Osman, Ali b. Mehmed