Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 200 Hüküm no: 110 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karcı Halil Çelebi’nin oğluna vasî olan Kadri Ağa’nın vesayetten feragat ettiği Medîne-i Hazret-i Ebâ Eyyûbeˈl-Ensârî aleyhi rahmetüˈl-Bârî mahallâtından İdris Köşkü mahallesinde sâkin iken bundan akdem vefât eden Karcıbaşı Halil Çelebiˈnin sulbî oğlu Emrullah nâm sagīrin vasî-i mansûbu olup kendi talebi ile azl olunan râfi‘a-i hâzeˈl-kitâb Kadri Ağa b. ( ) meclis-i şer‘-i hatîr-ilâzımüˈt-tevkīrde sagīr-i mezbûrun vâlidesi olup istikāmet ve diyâneti ve emr-i vesâyete kudret ve liyâkati ahâlî-i mahalle-i merkūmeden Mehmed Efendi ve İbrahim Beşe b. Ahmed ve Ali Beşe b. Mehmed ve Seydi Beşe b. Hüseyin ve Mustafa Beşe b. Yusuf ve Eyüb b. Ali ve Tekir Mustafa Çelebi ve gayrıları ihbârıyla ledeˈş-şer‘ zâhire ve mütehakkıka olmağla sagīr-i mezbûrun emvâlini hıfz ve ahvâlini zabt içün cânib-i şer‘den vasî nasb ve ta‘yîn olunan fahrüˈl-muhaddere Sabiha bt. el-Hâc Mustafa mahzarında ikrâr-ı tâm ve takrîr-i kelâm edip vasîsi olduğum sagīre-i mezbûre babası müteveffâ-yı merkūmdan irs-i şer‘le isâbet ve intikāl edip azlim zamanına gelince hıfzda ve taht-ı yedimde olan yüz bin yüz dört akçesinin otuz dokuz akçesini nakid ki min-haysüˈl-mecmû‘ yüz bin yüz otuz dört akçeyi rihân-ı makbûza-i adîdesi ile biˈt-tamam vasî-i mansûbe-i mezbûre Sabiha Hatun huzûrunda ba‘deˈl-addüˈt-tashîh yedine ref‘ ü teslîm ol dahi meblağ-ı mezbûru ve rihân-ı mezkûreyi vech-i meşrûh üzre biˈl-vesâye yedinden ahz ü kabz ve tesellüm eyledi ba‘deˈl-yevm meblağ-ı merkūmdan ve rihân-ı mezkûreden yedimde bir şey kalmayıp vesâyet-i mezbûreden kasr-ı yed eyledim dedikde et-tasdîkı’ş-şer‘î mâ vaka‘a biˈt-taleb ketb olundu. Fiˈl-yevmiˈl-işrîn min-şehri Saferiˈl-hayr li-sene erba‘a ve semânîn ve elf. Şuhûdüˈl-hâl: Fahrüˈl-eimmetiˈl-kirâm Mustafa Efendi, Mehmed Çelebi el-müezzin b. ( ), Mehmed Çelebi b. Mehmed el-cündî, Çavuşzâde, Şa‘bân b. Mehmed, Mustafa b. Ahmed Ağa