Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 200 Hüküm no: 111 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Reis b. Ali Bey’in terekesinden, Mehmed Beşe b. Ali’ye olan borcun ödenmesi İşbu râfi‘üˈl-vesîka Mehmed Beşe b. Ali meclis-i şer‘de mahmiye-i Galataˈya tâbi‘ Tophâneˈde Cihangir mahallesinden olup İstanköy’de fevt olan Ahmed Reis b. Ali Bey verâseti zevcesi Ümmühani bt. Aliˈye ve anası Aynî bt. Mustafaˈya ve li-ebeveyn er karındaşı Mehmed Beşe ve kız karındaşları Havva ve Emineˈye münhasıra oldukdan sonra mezkûrânın hüccet ile vekîl-i müsecceli olan Hüseyin Bey b. Abdülcelil mahzarında da‘vâ edip müteveffâ-yı mezbûrun gāibaniˈl-meclis Hasan b. Yakubˈa karz yüz esedî deyni olup emr u kabûlü hâviye kefâletle ben kefîl olmağın mezbûr Hasan meblağ-ı mezbûru benden biˈl-kefâle alıp ben dahi kableˈl-ahz fevt olmağla terekesinden taleb ederim suâl olunsun dedikde gıbbeˈs-suâl veˈl-inkâr ve ba‘de talebiˈl-beyyine udûl-ı ricâlden Ferhad b. Mehmed ve Hüseyin b. Hüseyin li-ecliˈş-şehâde hâzırân biˈl-meclis olup isreˈl-istişhâd fiˈl-hakīka müteveffâ-yı mezbûr gāib-i merkūma olan yüz esedî deynine emr u kabûlü hâviye kefâlet ile mezbûr Mehmed Beşe bizim huzûrumuzda kefîl olmağla mezbûr Hüseyin dahi biˈl-kefâle yine huzûrumuzda kabz eyledi bu husûsa şâhidleriz şehâdet dahi ederiz deyü edâ-i şehâdet dahi ederiz deyü edâ-i şehâdet eylediklerinde ba‘deˈt-ta‘dîl şehâdetleri makbûle oldukdan sonra müdde‘î-i mezbûr ba‘deˈt-tahlîf mûcebiyle hükm birle mâ hüveˈl-vâki‘ biˈt-taleb ketb olundu. Fî 5 min-Safer sene [10]84. Şuhûdüˈl-hâl: Ömer Efendi b. Ali, İsmail Efendi b. Ahmed, Mehmed b. Ahmed