Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 742 Hüküm no: 960 Orijinal metin no: [114b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köprülü ailesinden Mehmed Ağa b. Abdülmennân’ın kızı olup küçük yaşta vefat eden Ümmühani’nin terekesi hususundaki davada sulh olduğu Mahmiye-i İstanbul’da Sarrâc İshak mahallesinde sâkin olup bundan akdem aşçıbaşı kāimmakāmı iken vefât eden Mehmed Ağa b. Abdülmennân’ın sulbiye sagīre kızı olup bundan esbak vefât eden Ümmühâni nâm sagīrenin verâseti li üm kız karındaşı Âişe’ye ve müteveffâ-yı mezbûrun li ebeveyn müteveffâ er karındaşı oğlu merhûm Köprülü Mehmed Paşa’nın oğlu olup hâlâ vezîriâzam olan düstûr-ı mükerrem müşîr-i müfahham nizâmü’l-âlem nâzım-ı menâzımü’l-ümem Ahmed Paşa hazretlerine ve merhûm-ı mezbûrun âhar oğlu Mustafa Bey’e ve müteveffâ-yı mezbûr Mehmed Ağa’nın diğer müteveffâ karındaşının oğlu Mustafa Ağa’nın sulbî kebîr oğlu Hüseyin Çelebi’ye münhasıra ve tashîh-i mes’eleleri on sekiz sehimden olup sihâm-ı mezbûreden üç sehmi mezbûre Âişe’ye ve beşer sehmi mûmâ-ileyhim Ahmed Paşa ve Mustafa Bey ve Hüseyin Çelebi’den her birine isâbet ettiği şer‘an zâhir ve müte‘ayyin oldukdan sonra mezbûre Âişe’nin zevci ve tarafından husûs-ı âti’l-beyâna vekîl-i mezbûrenin zâtını ma‘rifet-i şer‘iyye ile ârifân olan Mahmud Efendi b. Mehmed ve Mehmed Efendi [b.] Şaban nâm kimesneler şehâdetleriyle şer‘an vekâleti sâbit olan Mehmed Çelebi [b.] Mustafa nâm kimesne[ler] meclis-i şer‘-i hatîr-i lâzımü’t-tevkīrde müşârün-ileyhim Ahmed Paşa ve Mustafa Bey ve Hüseyin Çelebi taraflarından husûs-ı âti’l-beyâna vekîl olup vekâleti Receb Bey b. Bayram ve Ahmed Bey b. Abdullah nâm kimesneler şehâdetleriyle sâbite olup bi’l-vekâle müteveffâ-yı mezbûrun terekesine vâzı‘ü’l-yed olan fahrü’l-akrân Kenan Ağa b. Abdülmu‘în mahzarında bi’l-vekâle ikrâr ve takrîr-i kelâm edip müvekkilem mezbûre Âişe müteveffât-ı mezbûrenin akār ve menkūl cemî‘ terekesine sihâm-ı mezbûreden üç sehim hissesi mukābelesinde vekîl-i mezbûr Kenan Ağa ile şerâiti hâvî ve mevâni‘den ârî bi tarîki’t-tehârüci’ş-şer‘î elli üç bin yüz [yir]mi dokuz akçeye sulh olup bedel-i sulh-i mezbûru vekîl-i mezbûr Kenan Ağa yedinden tamâmen ahz u kabz edip tereke-i müteveffât-ı mezbûra müte‘allika âmme-i de‘âvîden müvekkilûn-ı müşârün-ileyhim Ahmed Paşa ve Mustafa Bey ve Hüseyin Çelebi’yi ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Sâbikūn.