Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 741 Hüküm no: 959 Orijinal metin no: [114b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Köprülü ailesinden Mehmed Ağa b. Abdülmennân’ın vefat eden küçük kızı Ümmühani’nin terekesinin paylaştırılması
Mahmiye-i İstanbul’da Sarrâc İshak mahallesinde sâkin iken olup bundan akdem aşçıbaşı kāimmakāmı iken vefât eden Mehmed Ağa b. Abdülmennân’ın sulbiye sagīre kızı olup bundan esbak vefât eden Ümmühâni nâm sagīrenin vârisi li üm kız karındaşı Âişe’ye ve müteveffâ-yı mezbûrun li ebeveyn müteveffâ er karındaşı oğlu merhûm Köprülü Mehmed Paşa’nın oğlu olup hâlâ vezîriâzam olan düstûr-ı ekrem müşîr-i efham nizâmü’l-âlem nâzım-ı menâzımü’l-ümem hazret-i Ahmed Paşa’ya ve merhûm-ı mezbûrun âhar oğlu Mustafa Bey’e ve müteveffâ-yı mezbûr Mehmed Ağa’nın diğer li ebeveyn müteveffâ karındaşının müteveffâ oğlu Mustafa Ağa’nın sulbî kebîr oğlu Hüseyin Çelebi’ye münhasıra ve tashîh-i mes’eleleri on sekiz sehimden olup üç sehmi mezbûre Âişe’ye ve beşer sehmi müşârün-ileyhim hazret-i Ahmed Paşa ve Mustafa Bey ve Hüseyin Çelebi’den her birine isâbet ettiği şer‘an zâhir ve müte‘ayyin oldukdan sonra müşârün-ileyhim Ahmed Paşa ve Mustafa Bey ve Hüseyin Çelebi taraflarından husûs-ı âti’l-beyâna vekîl olup mahmiye-i mezbûrda Ayasofya-i Kebîr mahallesi sâkinlerinden Receb Bey b. İbrahim ve Ahmed Bey b. Abdullah nâm kimesneler şehâdetleri ile şer‘an vekâleti sâbit olan umdetü’l-akrân Kenan Ağa b. Abdülmu‘în ile mezbûre Âişe’nin vasîsi ve tarafından husûs-ı câ’i’l-beyâna kezâlik vekîl olup mezbûrenin zâtını ma‘rifet-i şer‘iyye ile ârifân olan Mahmud Efendi b. Mehmed ve Mehmed Efendi b. Şaban nâm kimesneler şehâdetleriyle şer‘an vekâleti sâbite olan Mehmed Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde müteveffât-ı mezbûrenin tesviye-i umûruna kıbel-i şer‘-i enverden mansûb vasîsi olmağla terekesine vâzı‘ü’l-yed olan fahrü’l-akrân el-Hâc Ali Ağa b. Mehmed mahzarında her biri vekâleten ikrâr ve takrîr-i kelâm edip mezbûr Ali Ağa müteveffât-ı mezbûrenin târih-i kitâbdan beş sene mukaddem vasîsi oldukda sagīre-i mezbûreye babası müteveffâ-yı mezbûrun cemî‘ terekesinden isâbet eden yüz otuz bin iki yüz yetmiş altı akçe kıymetli eşyâsı ile mûmâ-ileyhimâ Ahmed Paşa ve Mustafa Bey’in sagīre-i mezbûreye hibe-i sahîha-i şer‘iyye ile hibe eyledikleri yedi yüz bir esedî guruşa ve mahalle-i mezbûrede vâki‘ menzil icâresinden târih-i kitâba gelince müctemi‘ olan sekiz bin akçe ki cem‘an iki yük sekiz bin üç yüz yetmiş altı akçeyi vesâyeten ahz u kabz eyledikden sonra meblağ-ı mezbûrun dört bin akçesini müteveffât-ı mezbûrenin techîz ve tekfînine ve yüz altı bin akçesini hayâtında sagīre-i mezbûre ile hâdimlerinin nafaka-i mefrûza-i müstedânelerine ve otuz bin akçesini dahi babası müteveffâ-yı mezbûrun Abdullah Çelebi’ye olan düyûn-ı müsbetesine ve dokuz bin altı yüz akçesi dahi resm-i kısmet ve dellâliyye ve sâir mesârif-i lâzımesine harc ve sarf ettikden sonra meblağ-ı bâkī elli dokuz bin yüz yetmiş altı akçe dahi dokuz bin sekiz yüz altmış iki akçesi mezbûr Âişe’ye ve on altı bin dört yüz otuz yedişer akçesi mûmâ-ileyhim Ahmed Paşa ve Mustafa Bey ve Hüseyin Çelebi’den her birinin hissesine isâbet ettiği müvekkilûn-ı mezbûrûn ile müvekkile-i mezbûrenin hisselerini mezbûr Ali Ağa yedinden bi’t-tamâm ve’l-kemâl ahz u kabz eyledik ba‘de’l-yevm müteveffât-ı mezbûrenin terekesinden yedinde bir akçe ve bir habbe bâkī kalmadı dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî evâili şehri Ramazâni’l-mübârek li sene seb‘a ve seb‘în ve elf.
Şuhûdü’l-hâl: Habib Çelebi b. Durmuş, Ali Bey b. Hüseyin, Mehmed Efendi [b.] Süleyman, Halil b. ( ) müderris, Hüseyin Beşe b. Mehmed, Seydî Halîfe b. Receb, Abdullah Efendi [b.] Abdülkerim.
|