Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 211 Hüküm no: 123 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Ağa’nın varislerinin, merhum Osman b. Abdullah’taki alacak iddiasını ispat edememeleri sebebiyle alacak taleplerinin reddedildiği Mahmiye-i Galataˈya tâbiʽ kasaba-i Tophâneˈde Firuzağa mahallesinde sâkin iken bundan akdem vefât eden Ahmed Ağa b. Aliˈnin sagīr oğlu Süleyman ve sagīre kızları Fatma ve Havva ve Hadiceˈnin min-kıbeliˈş-şerʽiˈl-hatîr mansûb vasîleri ve vâlideleri Âişe bt. Muharrem nâm hatunlar tarafından zikri câ’î husûsa hüccet-i şerʽiyye ile vekîl olan Hüseyin Bey b. Abdülcelilˈin meclis-i şerʽ-i hatîrde yine kasaba-i mezbûre ki el-Hâc Memi mahallesinde sâkin iken bundan esbak vefât eden kayık kapıcısı Osman b. Abdullahˈın terekesine vâziʽatüˈl-yed olan zevcesi Hadîce bt. Ahmed nâm hatun mahzarında biˈl-vekâle üzerine daʽvâ ve takrîr-i kelâm edip müteveffâ-yı mezbûrun düyûn-ı kesîre-i müsbetesi ve sıgār-ı mezkûrînin dahi yüz otuz esedî guruşu hakk-ı şerʽîleri olup muhtâc-ı guremâ olmuş iken mezbûre Hadîce müteveffâ-yı mezbûr Osman Ağaˈnın nakid beş yüz guruş ile beş tencere, on sahan, beş yorgan ve iki velençe vesâir ism-i mâl ıtlâk olunur maʽlûmüˈl-evsâf eşyâsını ketm ü ihfâ etmekle hâlâ biˈl-vekâle merkūme Âişeˈden taleb ederim suâl olunsun dedikde gıbbeˈs-suâl veˈl-inkâr ve baʽde talebiˈl-beyyine ikâmet-i beyyineden izhâr-ı acz ve istihlâf etmeğin fiˈl-hakīka müteveffâ-yı merkūm Osman Ağaˈnın sâlifüˈz-zikr beş yüz guruş ile eşyâ-ı mezkûreyi ketm ü ihfâ etmediğine mezbûre Hadiceˈye yemîn teklîf olundukda ol dahi hasebüˈl-mesûl yemîn-i billâh-i teʽâlâ etmeğin mûcebiyle bilâ-beyyine bî-vech taʽarruzdan vekîl-i mezbûr menʽ olunup mâ vakaʽa biˈt-taleb ketb olundu. Fiˈs-sâdisveˈl-ışrîn min-Saferiˈl-hayr li-sene erbaʽa ve semânîn ve elf. Şuhûdüˈl-hâl: Mâ-sebak