Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 214 Hüküm no: 125 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hasan Çelebi b. Ali’nin, ölmeden önce Hoca Ali Vakfı’ndan aldığı borçların terekesinden ödendiği Mahrûse-i Galata hâricinde Hendekbaşı demekle maʽrûf mahâlde merhûm Hoca Ali mahallesi sükkânından olup merhûm-ı mezbûr Hoca Ali Vakfıˈna biˈl-fiʽil mütevellî olan râfiʽ-i hâzeˈl-kitâb el-Hâc Mustafa b. Osman meclis-i şerʽ-i hatîrde bundan mukaddem vakf-ı mezbûra mütevellî iken vefât edip verâseti zevce-i metrûkesi Fatma bt. Ali ile li-eb kız karındaşı diğer Fatma Hatunˈa münhasıra olan Hasan Çelebi b. Ali nâm kimesnenin muhallefâtına biˈl-verâse vâziʽatüˈl-yed olan mezkûre diğer Fatma mahzarında üzerine biˈt-tevliye daʽvâ ve takrîr-i kelâm edip müteveffâ-yı mezbûr Hasan Çelebi hayatında vakf-ı mezbûreye mütevellî iken nükūd-ı mevkūfesinden üç yüz yirmi kıtʽa esedî guruşunu kendi mesârifine sarf ve istihlâk edip vefât etmekle hâlâ meblağ-ı müstehlek-i merkūmu tevliyet-i mahkiyem hasebiyle taleb ederin suâl olunup terekesinden alıverilmesi murâdımdır dedikde gıbbeˈs-suâl ve akībeˈl-inkâr mûcebiyle meblağ-ı müstehlek-i mezbûru müteveffâ-yı merkūm Hasan Çelebiˈnin terekesinden edâ ve teslîme makarr-ı merkūme diğer Fatma Hatunˈa baʽdeˈt-tenbîh mâ vakaʽa biˈt-taleb ketb olundu. Fî-evâsıt-ı Saferiˈl-hayr li-sene erbaʽa ve semânîn ve elf. Şuhûdüˈl-hâl: Ahmed b. Mehmed, İsmail Bey b. İbrahim, Ahmed Efendi b. Abdullah, İbrahim b. İsmail, Mehmed Beşe b. Hasan, Mustafa Çelebi b. Ömer, Ali Bey b. ( )