Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 215 Hüküm no: 126 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un, merhum babası Osman Beşe’nin terekesine el koyan annesi Hatice’den hissesini aldığı Mahrûse-i Galata aʽmâlinden kasaba-i Fındıklıˈda Çukur Câmi‘i mahallesi sâkinelerinden Âişe Hatun bt. Osman Beşe meclis-i şerʽ-i hatîrüˈt-tevkīrde vâlidesi hâmile-i hâzeˈl-kitâb Hadîce bt. Abdullah mahzarında ikrâr ve takrîr-i kelâm edip bundan akdem mahalle-i mezbûrede sâkine iken vefât eden babam mezkûr Osman Beşeˈnin hîn-i vefâtında cümle muhallefâtını vâlidem mezbûre Hadîce Hatun ahz ü kabz edip muhallefât-ı mezbûrede biˈl-ırsiˈş-şerʽî bana isâbet hisseyi karza vermeyip taleb eylediğimde vermeden imtinâʽ etmekle beynimizde münâzaʽa vâkıʽa olmuş idi elhâletü hâzihî vesâtet-i muslihîn ile husûs-ı mezkûrdan beynimizi kırk beş esedî guruş üzerine ıslâh olundukda ben dahi sulh-ı mezbûru kabûl ve bedel olan meblağ-ı merkūmu vâlidem mesfûre Hadîce Hatun yedinden tamamen ahz u kabz edip husûs-ı mezbûrdan zimmetini ibrâ-i âmm-ı râfiʽüˈl-husâm ile ibrâ ve ıskāt eyledim baʽdeˈl-yevm husûs-ı mezkûra müteʽallika vechen mineˈl-vücûh ve sebeben mineˈl-esbâb merkūme Hadîce Hatun ile daʽvâ ve nizâʽım kalmadı dedikde gıbbeˈt-tasdîkiˈş-şerʽî mâ vakaʽa biˈt-taleb ketb olundu. Fiˈl-yevmiˈs-sânî min-şehri Rebîʽiˈl-evvel li-sene erbaʽa ve semânîn ve elf. Şuhûdüˈl-hâl: Ali Beşe el-mübâşir, Hasan Bey b. Abdullah, Mehmed b. Hasan, Mustafa b. Mansur, Ahmed Beşe b. Musa, Mustafa Beşe b. Abdi, İbrahim b. Bayram, Ahmed b. Osman