Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 66 Hüküm no: 29 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Âmir’in gemi reislerinden Kurd v. Nikola’da alacağı olduğu Tüccâr tâifesinden işbu bâ‘isü’l-kitâb el-Hâc Âmir b. Mehmed nâm kimesne makām-ı kazâda <> sefîne reislerinden Kurd v. Nikola nâm zimmî muvâcehesinde üzerine da‘vâ edip mezbûr Kurd zimmetinde karz-ı şer‘îden altı bin <> yüz seksen akçe hakkım olup meblağ-ı mezbûrun üç bin akçesini ahz u kabz edip bâkī kalan üç bin yüz seksen akçe hakkımı taleb ederim, suâl olunsun dedikde gıbbe’s-suâl mezbûr Kurd cevâbında müdde‘î-i merkūma altı bin akçe deynim olup üç bin akçesini kendüye teslîm edip ancak üç bin akçe deynim kalmışdır deyip ziyâdeyi inkâr ile cevâb vericek müdde‘î-i mezbûrdan da‘vâsına mutâbık beyyine taleb olundukda ityân-ı beyyineden ızhâr-ı acz edip istihlâf etmeğin müdde‘î-i mezbûr zimmetinde üç bin akçeden ziyâde deyni olmadığına mezbûr Kurd’a yemîn teklîf olundukda yemînden nükûl etmeğin meblağ-ı mezbûr üç bin yüz seksen akçeyi müdde‘î-i mezbûra edâya tenbîh olunup mâ-vaka‘a sebt olundu. Tahrîren fi’l-yevmi’s-sânî min-Şa‘bâni’l-mu‘azzam li-sene selâse ve sittin ve elf. Şuhûdü’l-hâl: Rıdvan b. Abdullah, Mehmed b. Mustafa, Mustafa b. Mehmed, Mehmed Çelebi b. Mustafa, Ali b. Mehmed.