Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 67 Hüküm no: 30 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hapiste bulunan Yorgi v. Yani’nin borçlarına Kosta v. Todori’nin kefaleti Mahmiye-i İstanbul hısnı ebvâbından Ayakapısı hâricinde vâki‘ selhhânede sâkin mumcu tâifesinden Kosta v. Todori nâm zimmî mahfil-i kazâda işbu bâ‘iseyü’l-kitâb Mahmud Beşe b. Ömer ve Himmet Beşe b. Mehmed mahzarında ikrâr ve takrîr-i kelâm edip Galata’da sahn-ı sultânîde hâlâ mahbûs olan tâife-i mezbûreden Yorgi v. Yani zimmetinde deyn-i şer‘îden mezbûr Mahmud Beşe’nin üç bin üç yüz on altı akçe ve mezbûr Himmet Beşe’nin dahi dört bin iki yüz kırk sekiz akçe ki cem‘an yedi bin beş yüz altmış dört akçe târîh-i kitâbdan bir sene tamamına değin müeccel ve mev‘ûd hakları olmağın meblağ-ı mezbûrun cem‘îsine merkūm Yorgi’nin emri ve mezbûrân Mahmud Beşe ve Himmet Beşe’nin kabûllerini hâviye kefâlet-i sahîha-i şer‘iyye ile ben kefîl oldum dedikde gıbbe’t-tasdîkı’l-mu‘teber yine zikr olunan selhhânede sâkinler olan mumculardan Panayot v. Mihal ve Yorgi v. Andriya ve Foti v. Yani ve Kasab Kosta v. Harpato nâm zimmîler dahi hâzirûn olup ecel-i merkūm hulûlünde kefâleti hasebiyle merkūm Kosta v. Todori’nin zimmetine lâzım gelen meblağ-ı mezbûr yedi bin beş yüz altmış dört akçenin cem‘îsine mezbûr Kosta’nın emri ile her birimiz kefîl olduk dediklerinde mezbûrân Mahmud Beşe ve Himmet Beşe dahi kabûl etmeğin mâ-hüve’l-vâki‘ gıbbe’t-taleb ketb olundu. Fi’t-târîhi’l-mezbûr. Şuhûdü’l-hâl: el-Hâc Mehmed b. el-Hâc Mahmud, Ahmed Beşe b. el-Hâc Hasan, Yusuf Beşe b. İbrahim, Mustafa Beşe b. Hasan.