Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 744 Hüküm no: 962 Orijinal metin no: [114b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mehmed’in, kendisinden haksız olarak tekâlif akçesi aldığını iddia ettiği Mehmed Çelebi hakkındaki iddiasını ispatlayamadığı Vilâyet-i Anadolu’da Çankırı kazâsına tâbi‘ Kermik nâm karye sâkinlerinden Mehmed b. Mehmed nâm kimesne meclis-i şer‘-i şerîf-i lâzımü’t-teşrîfde bi’l-fi‘l kazâ-i mezbûra kadı olan Şeyh Ahmed Efendi’nin, kethüdâ[sı] Mehmed Çelebi b. Mehmed mahzarında üzerine da‘vâ ve takrîr-i kelâm edip mezbûr Mehmed sen karye-i mezbûre ahâlîsinden tekâlîf vermezsen seni ehl-i örfe ahz ettiririm deyû benden bi gayrı vech-i şer‘î on esedî guruş ve on esedî guruşluk zolota ve on esedî guruşluk semen ki cem‘an otuz esedî guruşumu almışdır, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ müdde‘î-i mezbûr yedinden vech-i muharrer üzre on esedî guruş ve on esedî guruşluk zolota ve on esedî guruşluk semen ahz etmeyip üzerine red ve zamân lâzım olmadığına merkūm Mehmed’e yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince müdde‘î-i mezbûr Mehmed bilâ-beyyine mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çavuş b. Yusuf el-Mübâşir, Hüseyin Çelebi b. Mehmed, Mehmed b. Mustafa, Resul b. Rıdvan, Mehmed b. Ali.