Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 239 Hüküm no: 142 Orijinal metin no: [33a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hakimin annesi ölen Fâtıma adlı küçük kıza nafaka takdir ettiği Hâl-i hayatında mahrûse-i Galata a‘mâlinden Fındıklı mahallâtından Molla Çelebi mahallesinde sâkine iken bundan akdem vefât eden Âişe Hatun bt. Hasan Ağa nâm merhûmenin Fâtıma bt. Mustafa Ağa nâm sagīre kızına müteveffât-ı mezbûreden müntakil muhallefâtdan külle yevm nafaka ve kisve-bahâ ve sâir havâic-i lâzıme için kadr-ı kifâye meblağ farz ve takdîr olunmasını babası râfi‘-i hâze’l-kitâb mezbûr Mustafa Ağa taleb etmeğin, hâkim-i askerî el-muvakkı‘ a‘lâhü el-mütevakkı‘ rızâi rabbihî ve mevlâhu dahi sagīre-i mezbûreye nafaka ve kisve-bahâ için mal-ı mûrisden zeylde mezkûr târihden külle yevm râyicü’l-vakt on akçe farz ve takdîr edip meblağ-ı mefrûzu sagīre-i mezkûrenin havâicine sarfa ve vakt-i zarûretde istidâne ve hîn-i zaferde rücû‘a mezkûr Mustafa Ağa’ya izin birle mâ-vaka‘a biˈt-taleb ketb olundu. Cerâ zâlike ve hurrire fi’l-yevmi’l-hâdî ve’l-işrîn min-şehri Zilhicceti’ş-şerîfe li-sene selâse ve semânîn ve elf. Şuhûdü’l-hâl: Ömer Efendi el-kâtib, Hüseyin Çelebi b. Ali, İsa Bey b. Halil, Ahmed Çelebi b. Abdullah ve gayruhum mine’l-hâzırîn