Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 246 Hüküm no: 146 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Kapıcı Mehmed Bey’in çocuklarının vasîsi tarafından, merhumun karısı Raziye tarafından gizlendiği iddia edilen eşyaların, kocası tarafından hibe edildiği Mahmiye-i Galata a‘mâlinden kasaba-i Tophâneˈde Muhyiddin Efendi mahallesinde sâkin iken bundan esbak fevt olan Kapıcı Mehmed Bey b. Hayreddin nâm kimesnenin verâseti zevce-i metrûkesi Râziye bt. Abdullah ile sulbiye sagīre kızı Fatma ve li-eb erkarındaşı Aliˈye münhasıra olduğu şer‘an zâhir ve müte‘ayyin oldukdan sonra kendi tarafından asâleten ve sagīre-i mezbûrenin tesviye-i umûruna kıbel-i şer‘den mansûb vasîsi olan mezbûr Ali vesâyeten meclis-i şer‘de işbu bâ‘isüˈl-vesîka merkūme Râziye mahzarında üzerine da‘vâ ve takrîr-i kelâm edip müteveffâ-yı mezbûrun terekesinden iki döşek ve üç yorgan ve altı yemenî yasdık ve iki alaca ve bir kırmızı kilim ve bir Yanbolu kebesi ve bir ihrâm ve bir seccâde ve bir yan keçesi ve iki yasdık ve bir velençe ve bir çift leğen ibrik ve altı sahan ve bir sini ve bir tepsi ve iki tencere ve bir kebîr tâbe ve bir el tâbesi ve bir kazgan ve bir hamam tâbesi ve bir bakraç ve bir keçe ve bir güğüm ve bir kahve ibriği ve bir maşrabayı merkūme Râziye ketm ve ihfâ etmekle hâlâ vesâyeten ve asâleten mezbûreden taleb ederim suâl olunsun dedikde gıbbeˈs-suâl merkūme Râziye cevâbında zevcim müteveffâ-yı mezbûr hâl-i hayatında ve kemâl-i sıhhatinde eşyâ-i mezkûresini bin yetmiş yedi senesi Ramazanıˈnın on dördüncü gününde kasaba-i mezbûrede nâibüˈş-şer‘ olan zahrüˈl-müderrisîn Mevlânâ Mahzar Efendi b. Ahmed huzûrunda bana hîbe-i sahîha ile hîbe ve teslîm ve ben dahi meclis-i hîbede ve ba‘deˈl-kabz mevlânâ-yı mezbûr dahi târih-i mezbûr ile müverraha ve imzâ ve hatmini hâviye yedine hîbe hücceti vermişdi deyü takrîrine muvâfık hüccet-i şer‘iye ibrâz ve mezbûr Ali muvâcehesinde feth ü kırâet ve istintâk olundukda merkūm Ali mazmûn-ı hüccet-i mezkûreyi inkâr edicek mezbûre Râziyeˈden mazmûn-ı hüccet beyyine taleb olundukda udûl-ı ricâlden Mehmed b. el-Hâc Yusuf ve Abdullah b. Ahmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr hayatında târih-i mezbûrda mevlânâ-yı merkūm huzûrunda eşyâ-i mezbûresini zevcesi mezbûre huzûrumuzda hîbe-i sahîha ile hîbe ve teslîm ol dahi meclis-i hîbede ba‘deˈl-kabz mevlânâ-yı mezbûr dahi işbu hücceti [34b] müdde‘iyye-i mezbûre yedine vermişdir biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukdan sonra mûcebiyle mezbûr Ali bî-vech ta‘arruzdan men‘ birle mâ vaka‘a biˈt-taleb ketb olundu. Gurre-i şehri Rebî‘iˈl-âhir li-sene erba‘a ve semânîn ve elf. Şuhûdüˈl-hâl: Hasan Çelebi b. Ali, Bayram Beşe ed-debbağ, Mustafa Çelebi b. Mehmed, Musa b. Veli, Ahmed b. Osman