Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 248 Hüküm no: 148 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Nesîmî Beşe b. Ahmed’in çocuklarına vasî olan Hüseyin’in vesayetten feragati sebebiyle yerine Nesîmî’nin karısı Rabia’nın vasî tayin edildiği Mahrûse-i Galata dâhilinde vâki‘ Arab Câmi‘i mahallesi sükkânından iken vefât eden Nesîmî Beşe b. Ahmedˈin sulbî sagīr oğlu Ahmedˈin tesviye-i umûruna cânib-i şer‘den mansûb vasîsi olan Hüseyin b. Ahmed nâm kimesne meclis-i şer‘-i hatîr-i lâzımüˈt-tevkīrde vesâyet-i merkūmeden kat‘-ı yed edip azlini ihtiyâr etmekle hâkim-i muvakki‘-i kitâb tûbâ-lehû ve hüsnü-meâb dahi azl edip yerine bir vasîden lâ-büd olmağın sagīr-i mezbûrun vâlidesi olup istikāmet ve diyâneti ve emr-i vesâyeti ikāmete min-külliˈl-vücûh liyâkati udûl-ı Müslimînˈden cemm-i gafîr ihbârı ile ledeˈş-şer‘ sâbite ve müte‘ayyine olan râfi‘a-i hâzeˈl-kitâb Râbia bt. Mehmed nâm hatunu sagīr-i mezbûrun emvâlini hıfz ve ahvâlini hıfz içün vasî nasb ve ta‘yîn eyledikde ol dahi vesâyet-i mezkûreyi kabûl ve merâsimini edâya ta‘ahhüd ve iltizâm etmeğin mâ vaka‘a biˈt-taleb ketb. Fiˈl-yevmiˈs-sâlis min-şehri Rebî‘iˈl-âhir li-sene [10]84. Şuhûdüˈl-hâl: Ömer Efendi b. el-Hâc Ali, el-Hâc Mehmed b. Hasan, Seyfullah b. Musa, Şa‘bân Çelebi b. Ali, Musa Beşe b. Ahmed, Mehmed Çelebi b. Ömer, Mehmed Beşe b. Musa