Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 250 Hüküm no: 151 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Ağa’nın, merhum Ali Beşe b. Habib’teki alacaklarını varislerden tahsil ettiği Mahmiye-i Galataˈda muhtesib ağası olan Abdülkadir Ağa b. Kalender meclis-i şer‘-i şerîfde mahmiye-i mezbûr hâricinde Şahkulu mahallesinde sâkin iken bundan akdem vefât eden Ali Beşe b. Habibˈin verâseti zevce-i metrûkesi Fatma bt. Hüseyin ile vâlidesi Gevher bt. Şa‘bân ve li-eb kız karındaşı Fatma bt. Habib nâm hatunlara münhasıra olduğu şer‘an zâhir ve müte‘ayyin oldukdan sonra merkūme Fatmaˈnın vekîl-i müsecceli olan Ahmed Efendi b. Mustafa ve kızkarındaşı mezbûre Fatmaˈnın vekîl-i müsecceli olan el-Hâc Murad b. Mehmed ile ve mezkûre Gevherˈin dahi vekîl-i şer‘îsi Mehmed Çelebi b. Mehmed mahzarlarında ikrâr ve takrîr-i kelâm edip müteveffâ-yı mezbûr zimmetinde deyn-i şer‘îden yüz kırk üç esedî guruş ile ve cinsi ve vasfı ma‘lûm yedimden müşterâ ve makbûz bir gulâm bahâsından yedişer dirhem elli riyâlî guruş hakkım olup meblağayn-ı mezbûreyn kableˈl-istifâ vefât etmekle meblağayn-ı mezbûreyni müvekkilât-ı merkūmâtdan da‘vâ ve taleb eylediğimde anlar dahi inkâr etmekle beynimizde münâza‘ât-ı kesîre vâki‘a olmuşdu elhâletü hâzihî tavassut-ı muslihîn ile mezbûrât benimle an inkâr doksan esedî guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı merkūm doksan esedî guruş vükelâ-i mezkûrînin yedlerinden biˈt-tamam ahz u kabz eyledim ve mâ‘adâsı da‘vâlarından mezkûrâtın zimmetlerini ibrâ-i âm ile ibrâ ve iskât edip vechen mineˈl-vücûh hak ve alâkam kalmadı eğer ba‘deˈl-yevm husûs-ı mezbûra müte‘allik benden biˈl-asâle veyâ vekîlimden biˈl-vekâle da‘vâ sudûr ederse ledeˈl-hükkâmiˈl-kirâm makbûle olmasın dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈs-sâlis-i aşer min-şehri Rebî‘iˈl-âhir li-sene erba‘a ve semânîn ve elf. Şuhûdüˈl-hâl: Musa Efendi [b.] el-Hâc Mehmed, Ömer Efendi b. Ali, Musa b. İbrahim Efendi, Mahmud Halîfe b. Hasan, İbrahim Çelebi b. Mehmed, İsa Bey b. Halil, Hüseyin Çelebi b. Ali, Ahmed b. Osman