Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 745 Hüküm no: 964 Orijinal metin no: [115a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Derviş’in câriye diyerek el koyduğu Ümmühani’nin hür olduğu Sâbıkan rıkka inkıyâdı olup hâlâ iddi‘â-i hürriyet eden işbu orta boylu, çatık kaşlı, kara gözlü Ümmühâni bt. ( ) nâm hâtun meclis-i şer‘-i hatîrde rakīki olmak üzre kendisine vâzı‘ü’l-yed olan Mehmed b. Derviş nâm kimesne mahzarında üzerine da‘vâ ve takrîr-i kelâm edip vilâyet-i Anadolu’da medîne-i Diyarbekir kazâsına tâbi‘ Mardin kasabasında Bâb-ı Sûr mahallesinde sâkin Kurslu Mehmed nâm hürrü’l-aslın zevcesi Âmine nâm hürretü’l-asldan mütevellide sulbiye kızı olup aslen ebeveynime rık târî olmayıp hürretü’l-asılken merkūm Mehmed’e rakīk olmak üzre bana bi gayrı hakkın vaz‘-ı yed eder suâl olunup kasr- yedine tenbîh ve sebîli tahliyye olunması matlûbumdur dedikde gıbbe’s-suâl merkūm Mehmed müdde‘iyye-i mezbûreye rakīk olmak üzre vaz‘-ı yedini ikrâr ve lâkin vech-i meşrûh üzre hürretü’l-asl olduğu ma‘lûmum değildir deyû hürre olduğunu inkâr edicek müdde‘iyye-i mezbûre-i merkūmeden müdde‘âsını mübeyyine beyyine taleb olundukda udûl-i müslimînden olup fi’l-asl Diyarbekir’de Hacı Osman mahallesinden olup hâlâ mahmiye-i İstanbul’da Hoca Hanı’nda sâkin es-Seyyid Hasan Çelebi b. es-Seyyid Atâullah ve kezâlik Fethi Çelebi mahallesinden olup hâlâ mahmiye-i mezkûrdan Vezir hanı’nda sâkin Hüseyin Çelebi b. el-Hâc Haydar nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iyye-i mezbûre Ümmühâni kasaba-i mezbûrede zikr olunan Bâb-ı Sûr mahallesinde sâkin Kurslu Mehmed nâm hürretü’l-aslın refîkası Âmine bt. ( ) nâm hâtundan mütevellide ve sulbiye kızıdır biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı merkūmânın keyfiyyet-i hâlini suâl için kıbel-i şer‘-i enverden mevlânâ Sofu Mehmed Efendi b. Mustafa irsâl olunup ol dahi şâhidân-ı mezbûrândan her birinin sâkin olduğu hana varıp ahâlîsinden es-Seyyid Mehmed Çelebi b. es-Seyyid Abdullah ve Mehmed b. Ahmed ve Ahmed b. Receb ve Mustafa b. Hasan ve Osman Çelebi b. Hasan ve Ali Çelebi b. Hasan ve es-Seyyid Ahmed Çelebi b. Binaüddin ve Şahin Beşe b. Abdullah ve Mehmed Çelebi b. Mustafa ve Ahmed b. Mehmed ve el-Hâc Hüseyin b. Abdullah nâm kimesnelerden mezbûrânın keyfiyyet-i hâlini suâl eylediğinde her biri şâhidân-ı mezbûrân için âdil ve deyû alenen makbûlü’ş-şehâdedirler deyû her biri haber verdiğini mevlânâ-yı merkūm mahallinde tahrîr ba‘dehû ma‘an irsâl olunan Hasan b. Mahmud ile meclis-i şer‘a gelip alâ vukū‘ihî inhâ ve takrîr etmeğin şe[h]âdetleri makbûle olmağın mûcebince müdde‘iyye-i mezbûrenin vech-i mübeyyen üzre hürriyetine hükm ve sebîli tahliyye olunup mevsûfe-i mezbûre üzerinde mezbûr Mehmed’in yed-i mubtılasının kasr ve izâlesine tenbîh olunup mâ vaka‘a bi’t-taleb ketb olundu. Fî 22 min şehri Ramazâni’l-mübârek sene [10]77. Şuhûdü’l-hâl: Ahmed Çelebi b. Mehmed, Hızır b. Abdünnebi, İbrahim Çelebi b. Mehmed, Hasan Beşe b. Abdullah Çukadâr.