Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 264 Hüküm no: 160 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in, merhum Ali Reis b. Ahmed’in zimmetindeki alacağını varislerden talep ettiği Mahmiye-i Galataˈda Emekyemez mahallesinde sâkine işbu bâ‘isüˈl-vesîka el-Hâc Mehmed b. el-Hâc Muslı meclis-i şer‘de mahmiye-i mezbûre a‘mâlinden kasaba-i Tophâneˈde Cihangir mahallesinden olup bundan akdem Karadenizˈde Azak nâm mahâlde vefât eden Ali Reis b. Ahmedˈin verâseti zevcât-ı metrûkâtı Havva ve Âişe ve Fatma nâm hatunlar ile sulbî sagīr oğulları Hasan ve Ahmed ve İbrahimˈe münhasıra olduğu şer‘an zâhir ve müte‘ayyin oldukdan sonra sıgār-ı mezkûrînin tesviye-i emirlerine vasî-i muhtârları olup tereke-i müteveffâ-yı mezbûre vâzi‘uˈl-yed olan el-Hâc Beşir Beşe b. İsmail mahzarında üzerine da‘vâ ve takrîr-i kelâm târih-i kitâbdan altı sene mukaddem müteveffâ-yı mezbûre bi-tarîkıˈl-mudârebe kırk esedî guruş def‘ ve teslîm ol dahi ba‘deˈl-kabz meblağ-ı mezbûrun on beş esedî alıp bâkī yirmi beş esedî guruş kableˈl-istifâ fevt olup hâl-i hayatında meblağ-ı bâkī-i mezbûru bana deyni olduğunu huzûr-ı Müslimînˈde ikrâr ve işhâd dahi etmekle hâlâ vasî-i mezbûrun yedinde olan terekesinden taleb ederim suâl olunsun dedikde gıbbeˈs-suâl ve akībeˈl-inkâr ve ba‘de talebiˈl-beyyine udûl-ı Müslimînˈden el-Hâc Mahmud b. Mahmud Reis ve Ahmed Beşe b. Mustafa nâm kimesneler li-ecliˈş-şehâde fiˈl-hakīka müteveffâ-yı mezbûr hayatında müdde‘î-i mezbûre vech-i muharrer üzre bi-tarîkıˈl-mudârebe meblağ-ı mezbûr yirmi beş guruş zimmetimde deynimdir [37b] deyü huzûrumuzda ikrâr verdi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr ba‘deˈt-tahlîf mûcebiyle ba‘deˈl-hükm mâ vaka‘a biˈt-taleb ketb olundu. Fiˈr-râbi‘-i aşer min-şehri Rebî‘iˈl-âhir li-sene erba‘a ve semânîn ve elf. Şuhûdüˈl-hâl: el-Hâc Veli, el-Hâc Şahin b. Osman, el-Hâc Hasan b. Siyami, Eyüb Çelebi b. Ömer, Üveys b. Turhan