Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 278 Hüküm no: 168 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üveys Beşe b. Turhan’ın, merhum Ali Reis Yazıcı’nın zimmetindeki alacağını varislerden talep ettiği Mahmiye-i İstanbulˈda Balat kurbünde Hoca Kasım Gönânî mahallesinde sâkine râfi‘-i hâzeˈl-kitâb Üveys Beşe b. Turhan meclis-i şer‘-i hatîr-i lâzımüˈt-tevkīrde mahrûse-i Galata a‘mâlînden kasaba-i Tophâneˈde Cihangir mahallesi sükkânından olup bundan mukaddem Azak nâm mahâlde vefât eden Ali Reis Yazıcıˈnın vasî-i muhtârı olmağla tereke-i müteveffâ-yı mezbûra vâzi‘uˈl-yed olan el-Hâc Beşir b. İsmail mahzarında üzerine da‘vâ ve takrîr-i kelâm edip müteveffâ-yı mezbûre Ali Yazıcı zimmetinde cihet-i deyn-i şer‘îden iki yüz kırk kıt‘a esedî guruş hakkım olup hâlâ meblağ-ı mezbûr vech-i meşrûh üzre bana deyni olduğunu hayatındaalâ-ruûsiˈl-işhâd ikrâr ve işhâd dahi edip kableˈl-edâ vefât etmekle hâlâ meblağ-ı mezbûr terekesinden taleb ederim suâl olunup ihkāk-ı hak olunmak murâdımdır dedikde gıbbeˈs-suâl veˈl-inkâr müdde‘î-i mezbûrdan da‘vâsına beyyine taleb olundukda udûl-ı Müslimînˈden olup mahmiye-i mezbûrede merhûm Mahmudpaşa Hânıˈnda sâkin Mahmud Çelebi b. Ali ve İslâm Yazıcı b. Ali nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr Ali Yazıcı hâl-i hayatında ve kemâl-i akl u sıhhatinde işbu müdde‘î-i mezbûr Üveys Beşeˈye cihet-i deyn-i şer‘îden zimmetimde vâcibüˈl-edâ iki yüz kırk kıt‘a esedî guruş deynim vardır deyü huzûrumuzda ikrâr ve bizi işhâd eyledi biz bu husûsa şâhidiz şehâdet dahi ederiz deyü her biri edâ-i şehâdet-i şer‘iye eyledikde gıbbe ri‘âyet-i şerâyitiˈl-kabûl şehâdetleri makbûle oldukdan sonra gıbbeˈt-tahlîfiˈş-şer‘î mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-yevmiˈl-hâmis veˈl-işrîn min-şehri Rebî‘iˈl-âhir li-sene erba‘a ve semânîn ve elf. Şuhûdüˈl-hâl: el-Hâc Şahin b. Osman, el-Hâc Veli b. Ramazan, Eyüb Çelebi b. Ömer, Hacı Hasan b. Siyami, Yedekci Ahmed Beşe