Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 278 Hüküm no: 169 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Yazıcı’nın çocuklarına vasî tayin edilen Beşir’in, terekenin merhumun karısı Havva’dan alınıp kendisine verilmesini talep ettiği Mahmiye-i İstanbulˈda Balatkapısı kurbünde Hoca Kasım Gönânî mahallesi sükkânından bâ‘is-i hâzeˈl-kitâb el-Hâc Beşir [b.] İsmail meclis-i şer‘-i şerîf-i lâzımüˈt-teşrîfde mahrûse-i Galata a‘mâlinden kasaba-i Tophâneˈde Cihangir mahallesi sükkânından olup bundan mukaddem Azak nâm mahâlde vefât eden Ali Yazıcıˈnın sulbî sagīr oğulları Hasan ve İbrahim ve Ahmedˈin tesviye-i umûrlarına kıbel-i şer‘den mansûbe vasîleri olmağla tereke-i müteveffâ-yı mezbûra vâzi‘atüˈl-yed olan Havva bt. Abdullah nâm hatun tarafından husûmet ve redd-i cevâba vekîl-i müsecceli olan Hüseyin Bey b. ( ) nâm kimesne mahzarında da‘vâ ve takrîr-i kelâm edip müteveffâ-yı mezbûr Ali Reis hayatında beni vasî nasb ve ihtiyâr ben dahi vesâyet-i mezbûreyi kabûl ve merâsimini edâya ta‘ahhüd etmişdim hâlâ vefât etmekle vekîl-i mezbûrun müvekkilesi merkūme Havva tereke-i müteveffâ-yı mezbûre vaz‘-ı yed edip benim vesâyet-i mahkiyem hasebiyle vaz‘-ı yedime mâni‘a olup suâl olunup kasr-ı yedine tenbîh olunmak matlûbumdur dedikde gıbbeˈs-suâl vekîl-i mezbûr müvekkilesi merkūme Havvaˈnın tereke-i müteveffâ-yı mezbûre vaz‘-ı yedini ikrâr ve müdde‘î-i mezkûr el-Hâc Beşirˈin vasî-i muhtâr olduğunu inkâr edicek müdde‘î-i mezbûrdan da‘vâsına beyyine taleb olundukda udûl-ı Müslimînˈden ve sıkāt-ı muvahhidînden Ali Yazıcı b. Mustafa ve el-Hâc Veli b. Ramazan nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr Ali Yazıcı hayatında müdde‘î-i mezbûr el-Hâc Beşirˈi huzurûmuzda vasî nasb ve ihtiyâr edip ol dahi vesâyet-i mezkûreyi kabûl ve merâsimini edâya ta‘ahhüd eyledi biz bu husûsa şâhidiz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâyitiˈl-kabûl şehâdetleri makbûle olmağın mûcebiyle ba‘deˈl-hükm mezbûre Havvaˈnın terekesi müteveffâ-yı mezbûrdan kasr-ı yedine tenbîh birle mâ vaka‘a biˈt-taleb ketb olundu. Fiˈl-hâmis veˈl-işrîn min-şehri Rebî‘iˈl-âhir li-sene erba‘a ve semânîn ve elf. Şuhûdüˈl-hâl: Zülfikar Ağa b. Osman, Mehmed Çelebi b. Murad, Üveys Beşe b. Turhan, Hasan b. Mustafa